Keshe elimizdiń Syrtqy ister mınıstri Erlan Ydyrysov Astanaǵa jumys saparymen kelgen Halyqaralyq kórmeler bıýrosynyń Bas hatshysy Vısente Lossertalespen kezdesti.
Kezdesý barysynda taraptar birneshe jyldan keıin álem nazaryn Astanaǵa aýdartatyn EKSPO-2017 kórmesine daıyndyq máselesin jan-jaqty talqylady. Máselen, Qazaqstannyń syrtqy saıasat vedomstvosynyń basshysy Halyqaralyq kórmeler bıýrosynyń Bas hatshysyna EKSPO-2017 kórmesin joǵary deńgeıde ótkizý maqsatynda arnaıy qurylǵan Memlekettik komıssııanyń atqaryp jatqan jumysy jóninde aqparat bere kelip, qazaqstandyq taraptyń barlyq qajetti degen is-sharalardyń basyn qaıyratynyna sendirdi.
Erlan Ydyrysov bul kórmeniń Qazaqstannyń «jasyl» ekonomıkaǵa ótýine aıryqsha serpin bererlikteı biregeı jalpyulttyq joba ekenin, sondyqtan, onyń osy jańartylǵan energetıka salasynyń ınnovasııalyq damýyna taptyrmaıtyn alańǵa aınalýy qajettigin, atalǵan kórmeniń elimizdiń óz egemendiginiń 25 jyldyq mereıtoıyn atap ótkennen keıin bolatyny da sımvoldyq mánge ıe ekenin atap ótti.
Ekijaqty kezdesý barysynda Vısente Lossertales EKSPO jobasynyń belsendi qatysýshysyna aınalǵany úshin Syrtqy ister mınıstrligine alǵysyn bildirdi. Ol sondaı-aq, Qazaqstannyń halyqaralyq kórmeni ótkizýge daıyndyǵy tıisti deńgeıde ótkizilip jatqanyna toqtaldy. «Qazirgi tańda EKSPO-2017 kórmesine daıyndyq is-sharalary Halyqaralyq kórmeler bıýrosynyń barlyq talap-normalaryna sáıkes der kezinde oryndalýda», dedi ol.
Kezdesý sońynda taraptar Astanada EKSPO-2017 kórmesin joǵary deńgeıde ótkizý baǵytyndaǵy ekijaqty yntymaqtastyqty aldaǵy ýaqytta da jalǵastyra beretinderine múddelilik tanytty. Astanaǵa jumys sapary kezinde V.Lossertales, sondaı-aq, el basshylyǵymen jáne «Astana EKSPO-2017» ulttyq kompanııasy» AQ ókilderimen de kezdespek.
Láıla EDILQYZY,
«Egemen Qazaqstan».