Mádenıet jáne sport mınıstri Aqtoty Raıymqulova «Qurmet» ordeniniń ıegeri, Qazaqstannyń eńbek sińirgen qaıratkeri, Qazaqstan Respýblıkasynyń Ulttyq Mýzeıiniń dırektory Arystanbek Muhamedıulyna anasynyń qaıtys bolýyna baılanysty kóńil aıtty. Bul týraly Mádenıet jáne sport mınıstrliginiń baspasóz qyzmeti habarlady.
- Qadirli Arystanbek Muhamedıuly! Aıaýly anańyz, úlken áýlettiń ardaqty qarııasy Kúlimhan Júndibaıqyzy Tólendıevanyń dúnıeden ozýyna baılanysty qaıǵyńyzǵa ortaqtasyp kóńil aıtamyn.
Sanaly ǵumyryn salıqaly urpaq tárbıeleýge arnaǵan «Kúmis alqa» ıegeri Kúlimhan Júndibaıqyzy uzaq jyldar boıy etken eńbegi elenip, III dárejeli «Eńbek dańqy» ordenimen marapattalǵan ǵazız jan. Mádenıet salasynyń maıtalmany, ózińizdeı bilikti mamandy tárbıelep ósirgen asyl anańyzdyń jatqan jeri jaryq, topyraǵy torqa bolyp, nury peıishte shalqyǵaı, - dep jazylǵan kóńil aıtý hatynda.