О́skemendegi Abaı atyndaǵy oblystyq ámbebap kitaphana ujymy jaqynda Shákárim Qudaıberdiulynyń týǵanyna 155 jyl tolýyna oraı «Saharanyń dana oıshyly» taqyrybyndaǵy bıblıo-shańyraq jobasynyń ashylý saltanatyn ótkizdi.
Ortalyq saıabaqtaǵy Shákárim eskertkishiniń janyna qazaqy kıiz úı qurylyp, ishi ulttyq jıhazdarmen, qolóner buıymdarymen, jádigerlermen bezendirildi. Sonymen qatar, qazirgi zamanǵa saı zamanaýı sóreler men ústelderge aqyn ómiri men shyǵarmashylyǵyna arnalǵan kitaphana qorynda bar ádebıetter men basylym betterine shyqqan maqalalar qoıyldy. Uly ǵulamanyń shyǵarmalaryn nasıhattaý maqsatynda onkúndik baǵdarlama uıymdastyryldy.
Abaı atamyzdyń aqyn inisi, daryndy shákirti, murageri, izbasary Shákárim babamyzdyń óshpes murasyn osylaı áspettep, keıingi urpaqqa jetkizýdi ózimizge paryz sanaımyz. Sharaǵa qatysýshylarǵa Shákárim Qudaıberdiulynyń aqyn, sazger, sheber aýdarmashy, tereń oıshyl fılosof, tarıhshy, túrik ádebıetterin de zerttegen, jan-jaqty ensıklopedııalyq bilimi bar oqymysty bolǵanyn áńgimeledik. Aqyn babamyz naqaq jalanyń qurbany bolyp, GPÝ jendetteriniń qolynan qaza tapty, Baqanas aýylyndaǵy «Saıatqora» mańyndaǵy qudyqta 30 jyl boıy kómýsiz jatqan. 1961 jyly Ahat Shákárimulynyń arqasynda ǵana aǵasy uly aqyn Abaıdyń qasyna jerlendi.
Merekelik onkúndik aıasynda uıymdastyrylǵan sharalar Ortalyq saıabaqta, Shákárim kóshesiniń boıynda, jalǵasyn tabady. Aqyn shyǵarmashylyǵymen keńinen tanysqysy keletin kópshilik qaýym úshin qazaq úıinde «Saharanyń dana oıshyly» taqyrybyndaǵy kitap kórmesi on kún boıy qyzmet etedi.
Sholpan AIKEBAEVA,
Abaı atyndaǵy kitaphana qyzmetkeri.