Abaıdyń 175 jyldyǵyna oraı Prezıdentimiz Qasym-Jomart Toqaevtyń «Egemen Qazaqstan» gazetine bergen maqalasynan uly tulǵaǵa erekshe kóńil bólinetinin kórip, qýandyq. Bul bizdi, qalamgerlerdi qýantady, tolǵantady.
О́ıtkeni qalamger qaýym el úshin eń qıyn kezeńderde de «aldymen mádenıet kerek, sana kerek!» dep aıtýdan jańylǵan joq. Kerek deseńiz, bul nasıhattyń basynda uly Abaıdyń ózi, oǵan deıingi oıshyldar tur. Dana Abaıdyń ózi arsyzdyq, sanasyzdyq jarlylyqtan da jaman ekendigin «Qara sózderinde» kóp aıtty. Keıingi qalamgerler talaı qaıtalady. Biz kópten kútken táýelsizdigimiz qolǵa tıgende: «Osy egemendikti nyǵaıtý rýhanı baılyqpen qatar júrsin!» - dep armandaǵanbyz, rýhanı baılyq álsiregende qınalǵanbyz. Biz, biraq, keshegi qaıta qurýdyń qıyndyǵyna shydap shyqtyq. О́ıtkeni biz Abaıdy oqydyq!
Iá, biz Abaıdy oqyp ósken urpaqpyz. Biz Abaıdy jattap óstik. Árıne, biz oqyǵan mekteptiń talaby basqa boldy. Bizdiń urpaqtyń ózi Abaıdyń aıtqanyn ómirde tolyq iske asyra almady. Sebebi ádilettiń joly árqashan qıyn. Ol kúrespen keledi. Bul bizge ońaıǵa túsken joq.
Abaı bizge aldymen adamnyń jan-dúnıesin ońaltý úshin kerek.
Men qazirgi óskeleń jastarǵa – Qazaqstannyń keleshegin kemel etem degen jastarǵa: Abaıdy oqyńdarshy, kún saıyn jumysqa bararda Abaıdyń kitabynan bir dana sózdi oqyp shyǵyńdarshy!» deımin. Mysaly, Abaı aıtqan bes asyl is pen bes dushpannyń ózi oılanǵan adamǵa qoǵamdy tazartar súzgi bolar edi-aý!?
Biz búgin eń qymbat egemendikti ıelendik. Osy egemendikti saqtaý, nyǵaıtýǵa da Abaıdyń naqyl sózderi kómektesetin bolady. Sondyqtan Prezıdenttiń Abaıǵa kóńil bólgeni qalamger retinde meni qatty qýantady. Uly dalanyń bolashaǵyna Abaıdy oqý – óte kerek is! Menińshe, Abaıdy bilmegen qazaq ózin saýatsyzbyn, aqylsyzbyn, mádenıetsizbin dep sanaýy kerek.
Aqushtap BAQTYGEREEVA,
aqyn, Memlekettik syılyqtyń laýreaty
Batys Qazaqstan