Prezıdent Qasym-Jomart Toqaevtyń «Egemen Qazaqstan» gazetindegi Abaı týraly tolǵanysy keremet! Bul tarıhı oqıǵanyń basy byltyr, Hakimniń 175 jyldyq mereıtoıy qarsańynda dúrkirep alyp jónelgen edi. Kúlli Qazaq dalasy Abaı óleńderin oqyp ketti.
Abaıtaný buǵan deıin de bıik dárejege kóterilip qalǵan. Alǵash Abaı álemin ashqan Álıhan Bókeıhan, ony jerine jetkizgen Muhtar Áýezov bolsa, joǵary deńgeıde baıyptaýshy – Muhtar Maǵaýın. Al myna mereıtoıy barysynda Prezıdent buqaranyń betin birjola burǵany nur ústine nur boldy. Prezıdent munysymen bizdiń halyq Abaıǵa qarap boı túzemeı, kósheli elge aınala almaıtynymyzdy nusqap otyr. Bizdiń kóbimiz Abaıdy oqymaımyz. Atyn ǵana bilemiz. Onyń ózinde men kóp bilem degen jeleýmen bireýdi ımendirý, muqatý maqsatynda ǵana aıtamyz. Abaıǵa boılaǵan adam – qazaq halqynyń qadirin de, tragedııasyn da anaǵurlym anyǵyraq sezinip, qam qylatyn tulǵa.
Sonymen qatar Semeı qalasyna joǵary mártebe beretini de – kóregendik. Semeı – qazaqtyń rýhanı astanasy. Oǵan endigi ýaqytta provınsııa dep qaraý uıat! Osy ýaqytqa sheıin ekonomıkalyq salaǵa basa mán berip keldik. Rýhanııatty da qatar ustaý kerek onymen. Rýh kóterilmeı, ekonomıkamyz da órkendemeıdi. Ol úshin Qazaq eli ultymyzdyń rýhanı shamshyraǵy Abaıǵa bas qoıýy tıis!
Abaıdy oqyǵan Alashqa qyzmet etpeı qoımaıdy degen sóz!
Serik AQSUŃQARULY,
aqyn, Qazaqstannyń eńbek sińirgen qaıratkeri
Qaraǵandy oblysy