Eńbek jáne halyqty áleýmettik qorǵaý birinshi vıse-mınıstri Erjan Jylqybaev Túrkistan oblysyna jumys sapary barysynda Báıdibek, Saryaǵash, Qazyǵurt jáne Sozaq aýdandarynyń, Kentaý jáne Túrkistan qalalarynyń Halyqty jumyspen qamtý ortalyqtaryna (budan ári – HJQO) baryp, ataýly áleýmettik kómek (budan ári – AÁK) taǵaıyndaýǵa úmitker azamattardyń qujattaryn qabyldaý barysymen tanysty jáne halyqqa ony kórsetýdiń jańa tásilderin túsindirdi. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
О́ńir turǵyndarymen sóılese otyryp, Erjan Jylqybaev 2020 jylǵy 1 qańtardan bastap Qazaqstanda Prezıdent Qasym-Jomart Toqaevtyń tapsyrmasy boıynsha Eńbek jáne halyqty áleýmettik qorǵaý mınıstrligi ázirlegen AÁK kórsetýdiń jańa tetikteri jumys istep jatqanyn eske saldy.
«Memleket basshysy 2 qyrkúıektegi Qazaqstan halqyna Joldaýynda Úkimet aldyna AÁK taǵaıyndaý tetigin onyń ashyqtyǵyn, ádildigin jáne eńbekke yntalandyrýdy qamtamasyz etý maqsatynda túzetý, sondaı-aq tabysy az otbasylardaǵy balalarǵa arnalǵan kepildik berilgen áleýmettik toptamany engizý mindetin qoıdy. Memlekettik kómektiń jańa sharalary keshendi júzege asyrylady jáne oǵan kópbalaly otbasylardy qoldaý, jańǵyrtylǵan ataýly áleýmettik kómek, tabysy az otbasylardaǵy balalarǵa arnalǵan kepildik berilgen áleýmettik toptama kiredi» dedi vıse-mınıstr.
Kópbalaly otbasylardy qoldaý 4 jáne odan da kóp kámeletke tolmaǵan balalary nemese 23 jasqa deıingi kúndizgi oqý bóliminde oqıtyn stýdent balalary bar otbasylarǵa jańa memlekettik járdemaqy tóleý esebinen qamtamasyz etiletin bolady. Bul memlekettik járdemaqy otbasynyń tabysyna qaramastan saralanǵan mólsherde tólenetin bolady: 4 balaǵa – 42 496 teńge; 5 balaǵa – 53 127 teńge; 6 balaǵa – 63 757 teńge; 7 jáne odan da kóp balaǵa – 74 388 teńge.
«Biz buryn qoldanysta bolǵan shekti ólshemdi saqtadyq, oǵan sáıkes áleýmettik kómek taǵaıyndaý úshin otbasynyń árbir múshesine jan basyna shaqqandaǵy ortasha tabysy eń tómengi kúnkóris deńgeıiniń 70% - nan kem bolýy tıis. Otbasynyń barlyq músheleri úshin AÁK mólsheri jan basyna shaqqandaǵy tabys pen kedeılik sheginiń arasyndaǵy aıyrma retinde aıqyndalatyn bolady. AÁK ashyqtyǵyn qamtamasyz etý úshin ol toqsan saıyn taǵaıyndalatyn bolady, al otbasynyń materıaldyq jaǵdaıyna tekserý júrgizý merzimi 3 kúnnen 7 kúnge deıin ulǵaıtylady, bul proseste ýchaskelik komıssııalardyń róli kúsheıtiledi» dep tolyqtyrdy vıse-mınıstr.
Kepildik berilgen áleýmettik toptama AÁK alatyn otbasylardyń balalaryna usynylatyn bolady. Sonymen, 1 jastan 6 jasqa deıingi tabysy az otbasylardyń balalary azyq – túlik jıyntyǵymen jáne gıgıenalyq quraldarmen, 6 jastan 18 jasqa deıingi balalar mektepterde ystyq tamaqpen, oqý quraldarymen jáne mektep kıimderimen qamtamasyz etiledi, sondaı-aq olarǵa mektepke deıingi jol júrý shyǵyndary óteletin bolady. Medısınalyq, onyń ishinde stomatologııalyq kómek 18 jasqa deıingi balalarǵa tegin medısınalyq kómektiń kepildik berilgen kólemi jáne mindetti áleýmettik medısınalyq saqtandyrý sheńberinde kórsetiletin bolady.
Erjan Jylqybaev 367 myń kópbalaly otbasy qańtar aıynda jalpy somasy 17,7 mlrd teńgege joǵaryda kórsetilgen járdemaqyny alǵanyn atap ótti.
Ol sondaı-aq kópbalaly otbasylarǵa beriletin járdemaqydan basqa úıde jumys isteý úshin de, óz isin ashý úshin de keń múmkindikter usynylatyn atap ótti.
«Nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasyna qajetti ózgerister engizildi. Kópbalaly jáne tabysy az otbasy múshelerin kásipkerlikke tartý úshin olarǵa mıkrokredıtter jyldyq 4% - dan aspaıtyn paıyzdyq mólsherlememen 7 jylǵa deıingi merzimge jeńildikti sharttarmen beriletin bolady. Budan basqa, halyqtyń barlyq sanattary úshin memlekettik granttardyń biryńǵaı mólsheri – 200 AEK belgilengen. Sonymen qatar, kópbalaly jáne tabysy az otbasy músheleri aldyn ala oqýsyz grant alýǵa quqyly» dedi vıse-mınıstr.
Erjan Jylqybaev, sondaı-aq, azamattarǵa AÁK taǵaıyndaý úshin qujattardy tapsyrýǵa úlgermeıtini jóninde alańdaýdyń qajeti joq ekenin basa aıtty. Azamattardyń ótinishteri HJQO men ákimdikter janyndaǵy jumyspen qamtý bólimderinde qańtar aıynyń sońyna deıin qabyldanady.
Esterińizge sala keteıik, keshe vıse-mınıstr Shymkent qalasynda ataýly áleýmettik kómek taǵaıyndaýǵa úmitker azamattardyń qujattaryn qabyldaý barysymen tanysty.