О́tken jyldyń qarasha aıynyń sońǵy shıregi men jeltoqsan aıyndaǵy tabıǵat synyna Almaty oblysynyń jol jóndeýshileri tótep bere almaı qalǵan edi.
Aımaqtaǵy ishki qatynas joldaryn bylaı qoıǵanda, respýblıkalyq mańyzy bar trassalardyń qary kúrelmeı, kóktaıǵaq bolyp jatty. Sonyń kesirinen joldarda kólik apaty kóbeıip, adam ómirin jalmaǵan ondaǵan oqıǵa boldy. Bul oblystaǵy jol jóndeýshi uıymdardyń qar tazartý jumystaryna daıyn emestigin kórsetti. Al trassalardyń der kezinde kúrelmeýine jaýapty mekemelerdegi arnaıy tehnıkanyń jetispeýshiligi basty sebep bolǵan eken.
Jaqynda oblys aýmaǵynda kólik joldaryndaǵy tótenshe jaǵdaıdyń oryn alýyna qatysty jaǵdaı «Jetisý – adaldyq alańy» keńsesinde qaralyp, jaýapty mekemelerdi tártipke shaqyrý jaıy sóz boldy.
- Buǵan deıin tehnıkalardyń qysqy kezeńge daıyndyǵyn tekserý nátıjeleri boıynsha jol daıyndyǵymen aınalysatyn «Qazavtojol» AQ, «KazahAvtoDor» JShS uıymdarynda arnaıy tehnıkanyń jetkiliksizdigi anyqtalǵan. Osyǵan sáıkes, arnaıy tehnıkalardy alyp, olardy standartqa sáıkestendirý qajettiligi týraly usynys berilgen bolatyn. Olarǵa oblystyq polısııa departamentiniń qyzmetkerleri 25 jeltoqsanǵa deıin jol qaýipsizdigin qamtamasyz etý týraly eskertý de bergen. Tapsyrmanyń jedel júzege asýy men kórsetilgen kemshilikterdiń qanshalyqty joıylǵany jaıynda kólik júrgizýshiler arasynda baqylaý saýalnamasy júrgizildi. О́kinishke qaraı, respýblıkalyq mańyzy bar avtomobıl jolyna tehnıkalyq qyzmet kórsetýmen jáne jóndeýmen aınalysatyn «KazahAvtoDor» mekemesiniń buryn berilgen eskertýlerdi oryndamaǵany jáne joldy qysta kútip ustaýǵa qoıylatyn talaptardy saqtamaǵany anyqtaldy, - deıdi Sybaılas jemqorlyqqa qarsy is-qımyl agenttiginiń Almaty oblysy boıynsha departamenti basshysynyń birinshi orynbasary Jandos Jumabaev.
Nátıjesinde «KazahAvtoDor» seriktestigi Ákimshilik kodekstiń 462-babynyń 3-tarmaǵyna sáıkes aıyptalyp, is prosessýaldyq sheshim qabyldaý úshin sotqa joldanǵan. Iаǵnı, oblys joldaryndaǵy kútip baptaýǵa nemquraıly qaraǵany úshin mekeme endi 500 aılyq esep kórsetkishi mólsherinde aıyppul tóleıdi. Alaıda, «KazahAvtoDor» seriktestigin jol sapasy men adamdardyń qaýipsizdiginiń 1 262 500 teńgege baǵalanǵany oılandyrsa, qane...
Almaty oblysy