Almaty oblysynyń ortalyǵyndaǵy kóp páterli úılerdiń sany jeti júzden asady. Al osy turǵyn jaı aýmaǵynda 280 aýla men alańdar bar eken.
Qalanyń damý josparyna sáıkes bul aýlalar kúrdeli jóndeýden ótip, balalarǵa arnalǵan oıyn alańdary men sporttyq – demalys oryndaryna aınalýy tıis. Jańǵyrtý jumystary 2012 jyly bastalyp, 2019 jylǵa deıin qaladaǵy 100 aýla jóndelip, qoldanysqa berilgen. Al ótken jyldyń sońynda taǵy 48 úıdiń aýlasy jańartylýy tıis bolatyn.
Alaıda, aýlalardaǵy jańǵyrtý jumystaryna qala turǵyndarynyń kóńili tolmaıdy. Ásirese, qala ortalyǵynda turatyndar Qabanbaı batyr, Birjan sal, Nursultan Nazarbaev, I.Jansúgirov kósheleriniń boıyndaǵy turǵyn úılerdiń oıyn alańdaryn jóndeý uzaqqa sozylyp, qurylystyń jeltoqsan aıynyń ortasyna deıin jalǵasqanyn aıtady. Iаǵnı, adamdar úı mańyndaǵy joldar men trotýarlarǵa qar jaýǵannan keıin asfalt tóselgenine narazy eken. Olar qys ishinde salynǵan oıyn alańdary men joldyń sapasyna alańdaýshylyq bildirýde.
Aıtpaqshy, qalanyń Qabanbaı batyr, Birjan sal, Nursultan Nazarbaev, I.Jansúgirov kóshelerindegi turǵyn úılerdiń oıyn alańdaryn jóndeýge 213,5 mıllıon teńge, al Qablısa jyraý, Shevchenko, Kıvılev jáne M.Tólebaeva kósheleri men «Samal», «Músheltoı», «Qaratal», «Jetisý» shaǵyn aýdandaryndaǵy aýlalardy jańǵyrtýǵa 827,2 mıllıon teńge bıýdjet qarjysy jumsalypty.
Almaty oblysy