Erteń saǵat 15:00-de elordadaǵy Ulttyq mýzeıde «ESOSOPHY nemese kıeli tabıǵat» kitabynyń tusaýkeseri ótedi. Bul týraly mýzeıdiń baspasóz qyzmeti habarlady.
Bul kitap «Otbasy hrestomatııasy» qorynyń kezekti ónimi – Ekosofııa ǵylymyna negizdep qurastyrylǵan Qazaqstandaǵy alǵashqy joba. Munda ejelgi túrki dáýirinen bastalatyn qazaq folklorynyń tabıǵat jáne janýarlar álemi týraly qyzyqty mıfter, ańyzdar jınaqtalǵan. «Otbasy hrestomatııasy» qoǵamdyq qory balalardy qorshaǵan ortaǵa qurmetpen qaraýǵa baýlýdy kózdeıtin, olardyń boıynda jalpy kıeli tabıǵatqa janashyr kózqarasty qalyptastyratyn jańa ǵylym salasy – ekosofııa ǵylymyn dáripteýmen aınalysyp keledi.
Ekosofııa – ekologııa men fılosofııa ǵylymdarynyń sıntezinen kelip shyǵyp, qorshaǵan ortaǵa kıe bitirý arqyly adamnyń boıynda ekologııalyq mádenıet qalyptastyrýdy maqsat tutatyn kenje ǵylym.
Ekosofııa dep qorshaǵan ortany mán men mazmunǵa toltyrýdy aıtady. Bizde ekologııany qorǵaý zańdyq shekteýlerdi kúsheıtip, aıyppuldardy arttyrýǵa ǵana baǵyttalǵan. Alaıda mundaı kúrestiń nátıjesi shamaly. О́ıtkeni azamattardyń boıynda eko-etıket qalyptaspaǵan. Ekosofııa ǵylymy osy olqylyqtyń ornyn toltyrýdy kózdeıdi. Ol ósimdikter men janýarlar álemine bıologııa kózimen emes, baıyrǵy adamnyń sanasyndaǵydaı sakraldy, kıeli jaratylys retinde qaraýǵa shaqyrady.
Tusaýkeserge Ekologııa, geologııa jáne tabıǵı resýrstar mınıstri M.Myrzaǵalıev, ekologııa salasanyń mamandary, elimizge tanymal qoǵam qaıratkerleri keledi dep kútilýde.
Bul kitap byltyr qazaq dalasynda aqbókenderdi qorǵaımyn dep oqqa ushqan qoryqshylar – Erlan Nurǵalıev pen Qanysh Nurtazınov marqumdardyń rýhyna arnaldy.
Is-sharaǵa kelgen BAQ ókilderine kitap tegin beriledi.