Jambyl oblysynyń ákimi Asqar Myrzahmetov óńirde volonterlik-qaıyrymdylyq jobasyn bekitip, nátıjesinde osy ýaqytqa deıin aımaqtan 13 qaıyrymdylyq dúkeni ashylǵan. Sonymen qatar, búginde aımaqta 2000-ǵa jýyq erikti qaıyrymdylyq jumystarymen aınalysýda. Jambyl jastary bul maqsatta 250 myń úı men aýlany aralap, ár otbasynyń turmys jaǵdaıyna qatysty málimetterdi alǵan. Al óńirde ashylyp otyrǵan 13 qaıyrymdylyq dúkeniniń 3-eýi Taraz qalasynda, qalǵan 10 dúken aýdandarda ornalasqan.
Aımaqta ornalasqan erekshe dúkenderge kelýshilerge kıim-keshek tegin berilip, olarǵa tegin qyzmet kórsetiledi. Sonymen qatar zat alý úshin árbir azamat jeke kýáligimen kele alady. Al dúkennen zat alýǵa kelgen adam mindetti túrde arnaıy derekqor tirkeledi. Sodan keıin kelýshiniń mártebesi avtomatty túrde anyqtalady. Keıin muqtajdyǵyna qaraı qoldaý kórsetiledi. Búginge deıin 900-ge jýyq turǵynnyń tizimi jasalǵan bolsa, onyń 40 paıyzy dúkenge turaqty túrde keledi eken. Alaıda turǵyndar bul jerden zattardy alyp qana qoımaı, ótkizýine de bolady. Bul úshin qaladaǵy iri saýda jáne halyq kóp jınalatyn oryndarda arnaıy jáshikter ornatylǵan. Búginge deıin 5 jarym tonna kıim jınalyp, onyń bir bóligi muqtaj jandarǵa taratylǵan. Jınalǵan kıimderdi jónge keltirip, barynsha jýyp, tazalaıtyn volonterler jumysy uıymdastyrylǵan. «Áleýmettik karta 24 tarmaqtan turady. Olarǵa kıim, azyq-túlik beremiz. Biraq bul olardyń máselesin tolyq sheshpeıtini belgili. Sondyqtan da otbasyndaǵy jastardy oqytý, kásiptik baǵdar berý, jumyspen qamtý nemese olardy kásipke baýlý maqsatynda granttyq jobalarǵa tartamyz», deıdi Jambyl oblystyq jastar saıasaty máseleleri basqarmasy jastar resýrstyq ortalyǵynyń dırektory Baýyrjan Mórbekov. Endi, óńirdegi volonterler kelesi jyldan bastap túrli baǵytta jumys isteıtin bolady. Olardyń biri áleýmettik salany tańdasa, endi biri ulttyq qundylyq, rýhanı jańǵyrý, týrızm sııaqty salalardy tańdap otyr.
Jambyl oblysy