«Týǵan Aı tursa – Úrkerge qarsy qarap, qys túser – shaqyraıyp boran borap» degendeı, Arqada aqtútek boran borap tur. Jilik júgirer qystyń shildesi bel ortasynan aýǵanda bastalǵan boran birneshe kúnge sozylady deıdi. Árıne qys qystyǵyn qylmasa, jaz jazdyǵyn qylmaıdy. Tabıǵat ústemdigin bir tanytyp qoıǵanynyń da qaıyry bar shyǵar...
Aýa raıynyń buzylýyna baılanysty el astanasynyń bilim basqarmasy mektepterdiń barlyq synyptary men kolledjderdiń 1-2 kýrs stýdentterine sabaqtardy toqtatqanyn habarlady. Sonymen birge Pavlodar, Qaraǵandy jáne Semeı qalalarynda da mektep oqýshylaryna sabaq bolǵan joq.
Sondaı-aq Nursultan Nazarbaev halyqaralyq áýejaıynda 38 avıareıs keshiktirilip, 11 reıs toqtatyldy. Máselen, áýe kemesiniń basqa qalalardan kesh kelýi jáne baratyn áýejaıdaǵy nashar meteojaǵdaılar sebebinen ushyp kelýi tıis 22 reıs keshigýde. Nursultan Nazarbaev halyqaralyq áýejaıy baspasóz qyzmetiniń ókili Jeńis Ahmetjanovtyń aıtýynsha, jeldiń qatty ekpinine baılanysty ushý qaýipsizdigi maqsatynda áýe kemelerin muz qatýǵa qarsy suıyqtyqpen óńdeýge jol berilmeıdi.
Aqtútek boranǵa oraı Nur-Sultan qalasy ákimdiginde ótken otyrysta shahar basshysy Altaı Kólginov Tótenshe jaǵdaılar jáne Polısııa departamentteri men barlyq kommýnaldyq qyzmetterdiń kúsheıtilgen jumys kestesine kóshkenin málimdedi. Qala ákimi iKOMEK 109 biryńǵaı baılanys ortalyǵyna kóptegen ótinish túsýine baılanysty, qalanyń barlyq aýdanynyń ákimderi men basqarmalarynyń basshylary birinshi kezekte atalǵan máselelerdi sheshýge jumyldyrylǵanyn jetkizdi. Onyń ishinde kósheler men aýlalardaǵy, áleýmettik nysandardaǵy qardy tazalaýǵa basymdyq berildi. Oǵan PIK jáne jeke kompanııalardyń tehnıkalaryn tartý júkteldi. «Eń bastysy, qala turǵyndarynyń qaýipsizdigi» degen A.Kólginov elordalyqtardyń tabıǵat raıyna tózimdilik tanytýyn surady. Al qalalyq tótenshe jaǵdaılar departamentiniń bastyǵy Baýyrjan Syzdyqov qańtardyń qarly boranynyń toqtamaýyna baılanysty astanalyqtardyń jumys kúnin qysqartýǵa usynys jasady. «Halyqtyń qaladan tysqary shyqpaýyna, basshylardyń jumys kúnin qysqartýyna, qurylys alańdary jetekshileriniń bıiktiktegi jumystardy toqtatýyna, qatty qajettilik bolmasa, qala ishindegi avtokólikter men azamattardyń qozǵalysyn shekteýge keńes beremiz», dedi atalǵan otyrysta B.Syzdyqov. Onyń aıtýynsha, tańǵy saǵat 8.00-de departamentte jáne tórt aýdanda apattyq-qutqarý jáne aıaqsyz qaldyrmaıtyn jumystardy úılestirýge arnalǵan jedel shtab quryldy. Departamenttiń kezekshi qyzmeti kúsheıtilgen qyzmet kórsetýge kóshti, sondaı-aq Aqmola oblysynyń Tótenshe jaǵdaılar departamentimen ózara is-áreket jospary engizildi. Saǵat tańǵy 8.00-den keshki 18.00-ge deıin TJD qutqarýshylarynyń kúshimen avtojoldarda jel úrlegen qar qursaýynda qalǵan 61 kólikten 78 adam qutqarylyp, qardan tazalanǵan aýmaqtarǵa 39 jeńil kólik, 1 avtobýs, 1 júk kóligi, 1 qurylys tehnıkasy jetkizildi. Qutqarý jumystary jalǵasyp jatyr.
«Qazgıdromet» RMK baspasóz qyzmetiniń habarlaýynsha, 23-25 qańtar aralyǵynda elimizdiń kóptegen óńirinde qar jaýyp, boran men jel soǵady.
«Aldaǵy úsh táýlikte Qazaqstannyń aýa raıynda aıtarlyqtaı ózgeris bolmaıdy. Respýblıka aýmaǵy soltústiktegi Skandınavııa men Reseı arqyly kelgen atlantıkalyq sıklonǵa baılanysty atmosferalyq yqpaldyń qursaýynda bolady. Sondyqtan birqatar oblysta qar jaýyp, jel, batystan óte qatty daýyl turady. Teriskeı óńirlerde jeldiń uıytqýy sekýndyna 30 metrge deıin soǵady. Sonymen qatar tuman men kóktaıǵaq bolady», deıdi habarlamada.
«Jeldiń soqqanyna 28 saǵattan asty. Qazir sál basyldy. Biraq táýlikten asa sozylýy múmkin. Biz daýyldy der ýaqytynda eskertemiz. Jaýyn-shashyn kólemi – táýligine 37 santımetrden asty. Bul jaýyn-shashyn kóleminiń shamadan tys ekenin kórsetedi. Iаǵnı, bıyl eki aıdyń normasyna tatıtyn qar jaýdy», deıdi «Qazgıdromet» basshysy Mereke Abdrahmanov.
Sonymen birge elorda turǵyndary áreketsiz otyrmaýǵa, qalany qardan tazalaýǵa qolǵabys etýge bel sheshe kiristi. Máselen, astanalyq teatr qyzmetkerleri barsha qaýymdy #bizbirgemiz chelendjine qatysýǵa shaqyrdy. Olar áleýmettik jaǵynan az qamtylǵan jáne úıinde qamqorshysy joq otbasylar men azamattardyń aýlasyn úrlep tastaǵan úıindi qardy tazalaýǵa kómektesýde.