Bul týraly Premer-mınıstr Asqar Mamın Prezıdenttiń tóraǵalyǵymen ótip jatqan Úkimettiń keńeıtilgen otyrysynda aıtty.
Premer-mınıstr halyqty turǵyn úımen jáne sapaly ınfraqurylymmen qamtamasyz etý máselesi Úkimet baqylaýynda turǵanyn jetkizdi.
«2020 jyly 15 mln sharshy metr turǵyn úı salynady. 150 myńnan astam otbasy baspanaly bolady. 11 tazartý qurylystaryn jańǵyrtý bastalady. Jalpy, 2024 jylǵa deıin 53 tazartý qurylǵysyn 328 mlrd teńgege jańǵyrtý men qaıta jańartýdy aıaqtaý kózdelip otyr»,- dedi A. Mamın.
Úkimet basshynyń aıtýynsha, gazdandyrý boıynsha 44 jobany iske asyrǵan jaǵdaıda tabıǵı gazǵa qol jetkizgen turǵyn sany 1,2 mln-ǵa artady.
Aýyl turǵyndarynyń ómir sapasyn jaqsartý máselesi de kún tártibinde bar.
«Aýyl turǵyndarynyń ómir súrý sapasyn arttyrý úshin «Aýyl - El besigi» jobasy sheńberinde jańa standarttarǵa sáıkes 190 aýylda sapaly ınjenerlik, kóliktik jáne áleýmettik ınfraqurylymdy damytý boıynsha 800 joba iske asyrylatyn bolady. Jalpy, aldaǵy 7 jylda 3,5 myńnan astam aýyl ınfraqurylymyn jańǵyrtýǵa 900 mlrd teńge qarastyrylǵan»,- dedi Premer-mınıstr óz sózinde.