Qaraǵandy oblysynda Birgemiz aksııasy aıasynda 30 myńnan astam adam qalalar men aýdandardyń kósheleri men aýlalaryn qardan tazartý jumystaryna belsendi túrde at salysty.
Qar kúreýshilerdiń qatarynda óńirdiń belsendi turǵyndary, kásipkerler men memlekettik qyzmetshiler jáne jas eriktiler boldy.
Qaraǵandy oblystyq jastar isi jónindegi basqarmanyń basshysy Nurjan Jetpisbaev osy shara barysynda erekshe belsendilik jáne uıymshyldyq tanytqan jas eriktilerge rızashylyq bildirdi. Sondaı-aq, ol volonterlikti damytýdyń óte mańyzdy mindet ekenin atap ótti.
– Biz óz aýlasyn tazalaýǵa murshasy kelmeıtin ardagerlerge, jalǵyz basty zeınetkerlerge, múmkindigi shekteýli adamdarǵa kómektesemiz. Aýdandar men qalalardyń ákimdikteri óz kezeginde osy meken-jaılardyń qaryn syrtqa shyǵarý jumystaryn uıymdastyrdy, – dedi ol.
Qala jáne aýdan ákimdikteriniń málimetteri boıynsha, aksııaǵa 31 myńnan astam adam jáne 1643 kásiporyn men uıym qatysqan. Ortalyq kóshelerdiń, saıabaqtardyń, gúlzarlar men jaıa júrginshiler joldarynyń qaryn tazalaýǵa jáne shyǵarýǵa 803 birlik arnaıy tehnıka jumyldyryldy.
Birgemiz aksııasy Qaraǵandy oblysynyń barlyq qalalary men aýdandarynda ótip, óńir boıynsha 40 myń tekshe metr qar tysqa shyǵarylǵan.