Bilim jáne ǵylym mınıstri ǵylymı kadrlardy daıarlaýdy jetildirý jáne akademııalyq ortany jaqsartý jónindegi keıbir sharalardy atady.
«Ǵylymı qyzmettiń negizgi nátıjelerin jarııalaý úshin Bilim jáne ǵylym salasyndaǵy baqylaý komıteti usynǵan ǵylymı basylymdardyń tizbesine kiretin jýrnaldarǵa qoıylatyn talaptardy ózgertý bóliginde QR Bilim jáne ǵylym mınıstrliginiń №20 buıryǵyna ózgerister engizý týraly buıryq jobasy ázirlenip, sheshim qabyldandy», - dep jazdy Ashat Aımaǵambetov Facebook paraqshasynda.
Mınıstrdiń aıtýynsha, búginde oǵan kontenttiń joǵary sapasyn árdaıym qamtamasyz ete almaıtyn belgili bir ólshemder boıynsha iriktelgen 177 otandyq basylym kiredi. Osyǵan baılanysty, mınıstrlik Scopus jáne Web of Science sııaqty derekter qorynyń talaptaryna sáıkes osy jýrnaldarǵa qoıylatyn talaptardy beıimdeý boıynsha jumysty bastady.
«Qosarlanǵan jasyryn resenzııalaý, anyq redaksııalyq saıasat, qabyldanǵan maqalalardyń jýrnaldyń taqyryptyq baǵytyna sáıkestigi, sheteldik resenzentter, barlyq jarııalaý úrdisiniń transparenttiligi, kúshti redaksııalyq alqa, avtorlyq quqyqty qorǵaý jáne taǵy basqa talaptar 1-1,5 jyl ishinde kezeń-kezeńmen osy tizbege kiretin barlyq otandyq ǵylymı jýrnaldarǵa qoldanylady», delingen jazbada.
Mınıstrdiń málimetine súıensek, basylymdardyń sany qysqarady dep kútilýde. Bul jaǵdaıda
sapaly kontent úshin básekelestik artady jáne halyqaralyq deńgeıdegi ǵylymı basylymdardy shyǵarýdyń kásibı akademııalyq mádenıeti qalyptasady.