Árbir tapsyrma oryndalýymen qundy

Ekonomıkalyq damý jospary qabyldanady

Úkimettiń keńeıtilgen otyrysynda Memleket basshysy ekonomıkanyń sapaly ósýin qamtamasyz etý jáne halyqtyń tabysyn arttyrý jóninde naqty mindetter qoıǵan bolatyn. Jalpy 80-nen astam tapsyrma berildi.

Memleket basshysynyń tapsyrmalaryn iske asyrý boıynsha sharalar ke­shenin usynǵan Ulttyq ekonomıka mı­nıstri R.Dálenov orta merzimdi kezeńge ar­nalǵan ekonomıkalyq damý josparyn ázirlep, úsh zań aktisin qabyldaý qajet ekenin aıtty. Bul – jańa redaksııadaǵy «Tehnıkalyq retteý týraly» zań, Bıýdjet kodeksine ózgerister jáne Densaýlyq kodeksi. Sondaı-aq úsh baǵdarlamalyq qujatty bekitý qajettigi aıtyldy. Bul – Aqsha-nesıe saıasatynyń strategııasy, Saýda saıasaty baǵdarlamasy jáne Sý resýrstaryn basqarý baǵdarlamasy.

«Memleket basshysynyń árbir tapsyrmasyn mazmundy ári jedel pysyqtaý qajet. Osyǵan baılanysty Premer-Mınıstrdiń tóraǵalyǵymen Úkimette jumys tobyn qurý usynylady», dedi Ulttyq ekonomıka mınıstri. Jumys toby sheńberinde 10 shaǵyn top aıqyndalmaq. Bul toptar Memleket basshysynyń bar­lyq tapsyrmasyn qamtıdy. Memle­ket­tik organdardyń birinshi basshylary shaǵyn toptardy basqarady jáne olarǵa derbes jaýapkershilik júkteledi. Árbir shaǵyn toptyń sheńberinde Memleket basshysynyń tapsyrmalaryn is júzinde oryndaýǵa baǵyttalǵan naqty sharalar ázirlenýde.

Sonyń ishinde Salyq-bıýdjet saıasa­ty boıynsha memlekettik bıýdjet­tiń turaqtylyǵy úshin ashyq jáne prag­ma­tıkalyq saıasat qurý boıynsha sharalar ázirlenetin bolady. Barlyq salyqtyq preferensııalar men jeńildikter olar­dyń tıimdiligi turǵysynan taldanady. Bıyl 1 shildege deıingi merzimde Bıýd­jet kodeksine kontrsıkldik bıýdjet qaǵı­dalaryn bekitý boıynsha ózgerister engi­ziledi. Ekinshiden, aqsha-nesıe saıasa­ty men qarjy sektory boıynsha (Ult­tyq bank pen qarjy naryǵyn retteý jáne damytý agenttigi) ınflıasııa men ekonomıkalyq ósý arasyndaǵy konsen­sýsqa qol jetkizýge baǵyttalǵan sharalar jáne bıylǵy 1 shildege deıin aqsha-nesıe saıasaty strategııasy jáne hedjırleý ınfraqurylymyn damy­tý boıynsha usynystar ázirlenedi. Úshin­shiden, Memlekettik basqarý jáne kvazımemlekettik sektor boıynsha (UEM) quzyrettilik pen tıimdilikti arttyrýǵa jáne debıýrokratııaǵa qatysty sharalar ázirlenedi. Tórtinshiden, kásipkerlikti, básekelestikti damytý jáne memleket menshiginen alý boıynsha keshendi sharalar ázirlenip, iske asyrylady.

Kásipkerlerdiń memlekettik qoldaý men konsýltasııa alýyn ońaılatý maq­s­atynda «Bızneske arnalǵan úki­met» biryńǵaı terezesi qurylyp, jeke­she­lendirýge jatatyn obektilerdiń tizimi keńeıtiletin bolady.

Sondaı-aq agroónerkásiptik keshen, ónerkásip jáne qurylys, saýda saıasaty, áleýmettik saıasat, densaýlyq saqtaý, bilim berý salalary boıynsha barlyǵy 10 sharalar kesheni ázirlenedi.

«Memleket basshysynyń tapsyrmasyna sáıkes osy jylǵy 15 mamyrǵa deıin ortamerzimdi perspektıvaǵa arnalǵan ekonomıkalyq damý jospary qabyldanatyn bolady. Jumys toby ázirlegen negizgi sharalar josparǵa enedi. Árbir ortalyq memlekettik organ jáne jergilikti atqarýshy organ ony júze­ge asyrýǵa belsendi qatysady», dep túıin­dedi R.Dálenov bul jaıyndaǵy sózin.

 Aqsha-nesıe saıasatynyń strategııasy

Ulttyq bank tóraǵasy Erbolat Dosaev Memleket basshysy Qasym-Jomart Toqaevtyń Úkimettiń keńeıtilgen otyrysynda bergen tapsyrmalaryna sáıkes Úkimettiń, Ulttyq banktiń jáne Qarjy naryǵyn retteý jáne damytý agenttiginiń tıisti is-sharalar jospary kelisilgenin málimdedi.  Onyń aıtýynsha, Ulttyq bank­ke bekitilgen is-sharalar sheńberinde bir­qatar baǵyt boıynsha jumysty júr­gizý kózdelgen. Onyń ishinde aqsha-nesıe saıasatynyń tıimdiligin arttyrý, qar­jy júıesiniń turaqtylyǵy men jalpy ekonomıkalyq damý qajettiligi ara­syn­daǵy teńgerimdi qamtamasyz etý, valıýta naryǵyn damytý baǵyttary bar.

«Aqsha-nesıe saıasatynyń tıimdiligin arttyrý, ınflıasııalyq kútýlerdi turaq­tandyrý jáne ekonomıkany uzaqmer­zimdi qorlandyrýdy qamtamasyz etý úshin biz bıylǵy jylǵy naýryzdyń sońyna deıin Aqsha-nesıe saıasatynyń 2030 jylǵa deıingi strategııasynyń jobasyn ázirleımiz. Saraptamalyq qaýymdastyqpen talqylanǵannan jáne múddeli memlekettik organdarmen kelisilgennen keıin joba aǵymdaǵy jyldyń 1 shildesine deıin Ulttyq bank basqarmasyna usynylady», dedi ol.

Qarjy naryǵyn retteý jáne damytý agenttigimen, Úkimetpen birlesip, 2020 jyldyń 1 qazanyna deıin Ulttyq tólem júıesin damytý baǵdarlamasyn ázirleıdi. Ulttyq tólem júıesi barlyq múddeli taraptar úshin ózara tıimdi negizde qurylatyn bolady. 

Sondaı-aq E.Dosaev Ulttyq bank Qarjy naryǵyn retteý jáne damytý agenttigimen birlesip, 2020 jylǵy 1 shildege deıin Qarjy tehnologııalary men ınnovasııalardy damytýdyń 2020-2025 jyldarǵa arnalǵan tujy­rym­damasynyń jobasyn ázirleıtinin aıtty.

Memleket basshysy atap ótkendeı, tikeleı ınvestısııalardy tartý – eldi damytýdyń negizgi quraly. Bul rette Ult­tyq bank barynsha aıqyn málimetti alý úshin 2020 jylǵy sáýirden bastap munaı-gaz salasyn esepke almastan tikeleı shet­el­dik ınvestısııalardyń ákeliný statıs­tı­kasyn toqsan saıyn jarııalaıtyn bolady.

Birinshi basshylar derbes jaýap beredi

Úkimet otyrysynda Qarjy naryǵyn retteý jáne damytý agenttiginiń tóraǵasy Mádına Ábilqasymova atalǵan sharalar aıasyndaǵy qarjylyq retteýshiniń jumys baǵyttarynyń biri ‒ qarjylyq turaqtylyqty qamtamasyz etý, onyń ishinde bank júıesin qalypqa keltirý ekenin aıta kele, bıyl aqpan aıynda 2019 jyly bastalǵan bank júıesi aktıvteriniń sapasyn táýelsiz baǵalaý aıaqtalatynyn málimdedi. «Bank sektoryn qalypqa keltirý bıýdjet qarajatyn paıdalanbaı naryqtyq jaǵdaılarda provızııalar men kapıtaldyń barabar qoryn qurý arqyly jalǵasady», dep atap ótti ol.

Atalǵan máseleni qorytyndylaǵan Úkimet basshysy Asqar Mamın Memleket basshysynyń tapsyrmalaryn iske asyrý jónindegi Úkimet sharalarynyń kesheni osy jyldyń sońyna deıin memlekettik apparat qurylymyn ońtaılandyrýdy, básekelestikti qorǵaý jónindegi jumys­ty kúsheıtýdi, «Tehnıkalyq retteý týraly» zań jobasyn daıyndaýdy, sertı­fıkattaýdyń ulttyq júıesin damytýdy, osy jyldyń birinshi jartysynda salyq júıesin reformalaýdy, 2025 jylǵa deıin saýda saıasatynyń baǵdarlamasyn ázirleýdi, bıyl bıznestiń biryńǵaı aqparattyq servıske qol jetkizýin qamtamasyz etýdi kózdeıtinin atap ótti.

«Prezıdent Qasym-Jomart Toqaev, Elbasy Nursultan Nazarbaevtyń qazaq­standyqtardyń naqty tabysy men turmys sapasyn arttyrý jónindegi strategııalyq maqsattaryna qol jetkizýge baǵyttalǵan birqatar naqty tapsyrma berdi», dedi A.Mamın. Ol ınvestısııalardy belsendi túrde tartý, ekonomıkanyń shıkizattyq emes sektorlaryn, shaǵyn jáne orta bıznesti damytý, sondaı-aq jańa jumys oryndaryn qurý Úkimettiń árbir múshesi men ákimderdiń negizgi basymdyqtaryna aınalýy tıis ekenin aıtty.

«Ulttyq ekonomıka mınıstrligi Mem­leket basshysynyń tapsyrmala­ryn iske asyrý boıynsha sharalar keshenin usyndy. Jaýaptylar men oryndalý merzimderi anyqtaldy. Endi úılesimdi jumysty uıymdastyrý qajet. Prezıdenttiń alǵa qoıǵan barlyq mindetteri naqty oryndalýy tıis. Buǵan memlekettik organdardyń birinshi basshylary derbes jaýap beredi», dedi A.Mamın.

Prezıdenttiń ónimsiz bıýdjet shyǵys­taryn qysqartý jónindegi tapsyrmasyn oryndaý aıasynda Úkimet basshysy mı­nıstrlerge, óńirlerdiń ákimderine jáne ulttyq kompanııalardyń basshylaryna bir apta merzim ishinde Qarjy mınıstr­li­gine tıisti usynystar engizýdi tapsyrdy.

 Maqsat – sý tapshylyǵynyń aldyn alý

Úkimet otyrysynda qaralǵan kelesi másele boıynsha Ekologııa, geologııa jáne tabıǵı resýrstar mınıstri Maǵzum Myr­za­ǵalıev 2020-2030 jyldarǵa arnal­ǵan Qazaqstannyń sý resýrstaryn bas­qarý jónindegi memlekettik baǵdarlama tujyrymdamasyn tanystyrdy. Bul qujat ta Tuńǵysh Prezıdent – Elbasy N.Nazarbaevtyń Qaýipsizdik Keńesiniń otyrysynda jáne Memleket basshysy Q.Toqaevtyń 2020 jylǵy 24 qańtarda ótken Úkimettiń keńeıtilgen otyrysynda aıtylǵan tapsyrmasyna sáıkes ázirlendi.

M. Myrzaǵalıev atap ótkendeı, eldiń jyl saıynǵy jerústi sý qory 100 tekshe shaqyrymdy quraıdy, onyń 46 tekshe shaqyrymy Qazaqstannan tys jerlerde qalyptasady.

«Jalpy, 100 tekshe shaqyrym sýdyń 50 tekshe shaqyrymy ekologııalyq tepe-teńdikti saqtaý úshin qajet. 24 tekshe shaqyrymǵa jýyǵy ekonomıkada qoldanylady, onyń ishinde, 16 tekshe shaqyrymy  – aýyl sharýashylyǵynda, 7 tekshe shaqyrymy – ónerkásipte jáne 1 tekshe shaqyrymy sý sharýashylyq-turmystyq qajettilikter úshin paıdalanylady», dedi mınıstr.

Dúnıejúzilik resýrstar ınstı­tý­tynyń baǵalaýy boıynsha, Ortalyq Azııa elderi sý tapshylyǵy joǵary elderdiń qataryna jatady, al Qazaqstan ortasha-joǵary sý tapshylyǵy bar elderdiń qataryna kiredi.

«Eskirgen ınfraqurylym jáne so­nyń saldarynan bolatyn sýdyń ysyrappen paıdalanylýy, sapaly sýdyń tapshylyǵy, tarıf esepteýde qoldanylatyn tetiktiń álsizdigi, bilikti kadrlardyń jetis­peý­shiligi, kórshiles memlekettermen sý bólý máseleleri – qazirgi sý salasyn­daǵy asa ózekti máseleler. Joǵaryda atal­ǵan problema­lar­dy sheshý úshin Qazaqstannyń sý re­sýrs­­taryn basqarýdyń 2020-2030 jyl­dar­ǵa arnalǵan memlekettik baǵdarla­masyn ázirleý qajet. Osy másele boıyn­sha Elbasy men Memleket basshysy­nyń tıisti tapsyrmalary bar», dedi M.Myr­zaǵalıev.

Atalǵan máseleni qorytyndylaǵan Úkimet basshysy Asqar Mamın: «El­basy N.Nazarbaev pen Memleket basshysy Q.Toqaev bizdiń aldymyzǵa elimiz­diń sý resýrstaryn paıdalaný men qor­ǵaýdyń tıimdiligin arttyrý mindetin qoıdy. Osyǵan baılanysty Sý resýrstaryn basqarý baǵdarlamasynyń tujyrymdamasy jasaldy. Ol bizdiń strategııalyq maqsattarymyzǵa ja­ýap beredi jáne Parlamentten qoldaý kórsetilgen. Tujyrymdama sala sarapshylary, depýtattar jáne Nur Otan fraksııasynyń músheleriniń qatysýymen talqylandy», deı kele, baǵdarlamanyń sapaly ázirlenýin qamtamasyz etýdi tapsyrdy.