Qostanaı oblysynda sońǵy aptada tolassyz soqqan dúleı boran saldarynan jol qatynasy qıyndap ketti. О́ńirde sońǵy bir jeti ishinde qar shamadan tys qalyń túsip, at qulaǵy kórinbeıtin aq tútek boran kúsheıip tur. Sondyqtan respýblıkalyq mańyzy bar kúre joldardyń boıyndaǵy 5 aýmaqta jáne oblystyq mańyzy bar joldardyń 22 aýmaǵynda kólik qozǵalysyna shekteý qoıyldy.
– Oblystyq tótenshe jaǵdaılar departamentiniń qutqarýshylary sońǵy úsh táýlik ishinde 21 qutqarý sharasyn ótkizip, qar qursaýynda qalǵan 121 jolaýshynyń ómirin aman alyp qaldy. Olardyń ishinde 6 bala bar. Zardap shekkender joq. Qutqarý jumystary áli de jalǵasýda. Qańtardyń 28-ine qaraǵan túni Amankeldi, Qamysty, Áýlıekól, Qostanaı aýdandary men Arqalyq qalasynyń mańynda 8 qutqarý sharasyn ótkizdi. Nátıjesinde kólikteri qarǵa batyp qalǵan 22 adam qutqarylyp, qaýipsiz jerge jetkizildi, – deıdi oblystyq Tótenshe jaǵdaılar departamentiniń baspasóz hatshysy Ýálıhan Dosanov.
Oblys qutqarýshylary kún-tún demeı qyraǵy kúzette tur. Olar jolda qalǵandardy qutqarýmen qatar, qar qursaýyndaǵy eldi mekenderdiń turǵyndaryna kómek kórsetýde. Máselen, 27 qańtar kúni Chernıgov aýylynyń ákimi Áýlıekól aýdanynyń qutqarýshylaryna habarlasyp, ystyǵy kóterilip jatqan 3 aılyq náresteni 45 shaqyrym qashyqtyqta jatqan aýdandyq aýrýhanaǵa shuǵyl jetkizýdi suraǵan. Arnaıy tehnıkanyń kúshimen eldi mekenge jedel jetken qutqarýshylar ana men balany der kezinde aýrýhanaǵa jetkizdi.
«Qazgıdromettiń» oblystyq fılıalynyń ınjener-sınoptıgi Svetlana Kannyń aıtýynsha, sársenbiden bastap óńirde boran tolastap, arty aıazǵa ulasady.
Nurqanat QULABAEV
Qostanaı oblysy