Qar qalyń, qaýip kóp

Jolda qalǵany bar, úsik shalǵany bar, áıteýir beıǵamdyqqa boı aldyrǵan ókpek jolaýshylardyń is-áreketi tıisti oryndardy alańdatýda. Beısaýat jolaýshyny jolǵa shyǵarmaý maqsatynda oblys aýmaǵyndaǵy avtokólik joldaryna 125 jedel qımyldaıtyn blok-beket qoıyldy. Kúre joldy basyp qalǵan qasat qardy tazalaý úshin 80 tehnıka men jergilikti polısııa qyzmetiniń 160 adamy, departamenttiń 30 tehnıkasy men 50 adamy jumyldyrylǵan. Jolda qalǵan tehnıkalardy qasat qardan arshyp alyp, toptastyryp, barar jerine jetkizip salý uıymdastyrylýda. Áıtse de, dál mundaı ýaqytta ózine de, ózgege de bes batpan beınet arqalatyp, táýekelge bel býyp, jolǵa shyqpaǵan abzal.

– Sońǵy bir jumanyń ishinde oblystyń avtokólik joldaryndaǵy qozǵalysqa 29 márte shekteý qoıyldy, – deıdi oblystyq Tótenshe jaǵdaılar departamenti basty­ǵynyń orynbasary Manarbek Shapaǵatov, – jergilikti atqarýshy organdarmen birlese otyryp 298 jolaýshy qutqaryldy.

Jergilikti polısııa qyzmeti basqar­masynyń basshysy Serik Baımuqanovtyń aıtýyna qaraǵanda, jylytý beketterine 478 adam jetkizilgen. Olardyń 23-i – ba­la. Mundaı oqıǵalar Ereımentaý, Býra­baı, Atbasar, Selınograd, Aqkól jáne Qorǵal­jyn aýdandarynda da kóp kezdesýde.

Áli de kúre joldardyń barlyǵy tegis tazalanyp bolǵan joq. Dál qazir blok-be­ketterde 600-den astam avtokólik jolǵa shy­­ǵa almaı qańtarylyp tur. Olardyń kóp­­shiligi alysqa júk tasymaldaıtyn aýyr kólikter.

Bıylǵy qysta qar ádettegiden kóp tústi. Aýa raıyn boljaıtyn bıýronyń málimetine qaraǵanda, sońǵy táýlikterde ádettegiden úsh ese kóp qar jaýǵan. Qazir oblys taǵy avtokólik  joldaryn 141 qýatty tehnıka qardan tazalaýda. Abyroı bolǵanda osyn­daı jumylǵan judyryqtaı bolyp, qaýipsizdik úshin óz bastaryn qaterge tigip ju­mys isteý arqyly adam shyǵyny joq.

Oblys ortalyǵy da, eldi mekenderde de jylý berý qalypty uıymdastyrylýda. Tabı­ǵattyń tótenshe minezine tótep berip, qa­terdiń betin qaıtarý iskerlik pen birliktiń belgisi.

Aqmola oblysy