Qazaqstandyq bylǵary qolǵap sheberi Qaırat Eralıevti Rıo-2016 Olımpıadasynyń 1/8 fınalynda jeńgen ózbek boksshysy Mýrodjon Ahmedalıev (7-0, 6 KO) WBA Super jáne IBF tujyrymdary boıynsha ekinshi jeńil salmaqta álem chempıony ataǵy úshin amerıkalyq Danıel Romanmen (27-2-1, 10 KO) jekpe-jekke shyǵady.
Shynyn aıtqanda, kásipqoı boksta segizinshi jekpe-jeginiń ózinde áıgili tujyrymdar boıynsha álem chempıony ataǵyna qol jetkizý múmkindigin beretin aıqasqa joldama alý – úlken jetistik, tarıhı oqıǵa. Iаǵnı, Mýrodjon Ahmedalıevtiń ózbek kásipqoı boksynyń tarıhynda tuńǵysh álem chempıony atanýyna zor múmkindigi bar.
Sarapshylar bul jekpe-jekte Danıel Romandy favorıt sanaǵanymen, ózbek boksshysynyń da ózine degen senimi mol.
«Bizdiń aramyzda eshqandaı aıyrmashylyqtyń joq ekenin kóretin bolasyzdar. Bul meniń mansabymdaǵy eń mańyzdy jekpe-jek, sol sebepti men aıanbaı aıqasatyn bolamyn», dedi ol jýrnalısterge bergen suhbatynda.
Eger de salystyrar bolsaq, qazirgi ýaqytta kásipqoı boksta júrgen jerlesterimiz Danııar Eleýsinov (8-0-4 KO), Jánibek Álimhanuly (8-0-4 KO) jáne Batyr Júkembaev (18-0-14 KO) mundaı joǵary múmkindikke áli qol jetkize qoıǵan joq.