Mádenıet jáne sport mınıstrliginde ótken keńeıtilgen alqa májilisinde Nurǵısa Dáýeshov tarıhı-mádenı muramyzdy nasıhattaý maqsatynda mýzeılerdiń elimizde jáne shetelde ótkizgen kórmeleriniń sany sońǵy 3 jylda 29,4 %-ǵa óskenin jetkizdi. Bul týraly Mádenıet jáne sport mınıstrliginiń baspasóz qyzmeti habarlady.
«Jalpy ótken jyly 100-den asa iri jobalar iske asyryldy. Bul qatarda belgili etnograf, mýzykataný men kompozıtorlyq mekteptiń negizin qalaýshylardyń biri Aleksandr Zataevıch 150 jyldyq mereıtoıy, KSRO Halyq ártisi Bıbigúl Tólegenovanyń 90 jyldyǵyna arnalǵan jyl boıy «Operalııa» halyqaralyq festıvali aıasynda birqatar is-sharalar, Qazaqstannyń halyq jazýshysy Ábdijámil Nurpeıisovtyń 95 jyldyq mereıtoıyna arnalǵan shyǵarmashylyq konserti, Tunǵysh Prezıdent kúnine arnalǵan «Elin súıgen, eli súıgen Elbasy» atty merekelik konsert, Qazaqstannyń Reseıdegi Mádenıet kúnderi, jas ánshi Erjan Maksımniń konserti, «Voice of Nur-Sultan» estradalyq oryndaýshylardyń halyqaralyq festıvali, «Bala daýysy» ulttyq balalar án baıqaýy t.b. bar. 2019 jyly «Altyn adamnyń sherýi» jobasy Tatarstan, О́zbekstan, Malaızııa, Grekııa, Túrkııa, Polshada uıymdastyrylsa, 2020-2021 jyldary Ulybrıtanııa, Japonııa, AQSh, Grýzııa, Italııa, Fransııa, Avstrııa elderinde ótedi» dedi Nurǵısa Dáýeshov.
Sonymen qatar Vıse-mınıstr búginde Qazaqstandyq ulttyq elektrondyq kitaphanasynyń kontenti 60 myń danaǵa jetkendigin aıtty.
«Sondaı-aq 2019 jyly elektrondyq kitaphana qyzmetin álemniń 115 elinen 200 myńǵa jýyq adam paıdalanǵan. Ál-Farabıdiń 1150 jyldyǵyn toılaý qarsańynda ǵulama oıshyldyń eńbekteri qazaq tilinde 7 tom, orys tilinde 7 tom jáne aǵylshyn tilindegi aýdarmasy bir tom bolyp basylyp shyqty. Sonymen qatar 2019 jyly 144 atalym kitap jalpy taralymy 647 500 myń danamen respýblıka kitaphanalaryna qaıtarymsyz taratyldy» dedi ol.