Qazaqstannan aǵaly-qaryndasty eki jetkinshekti asyrap alǵan amerıkalyq erli-zaıypty 49 jasar Lında jáne 50 jastaǵy Djozef Meıottardyń sol ókil balalaryn zorlaǵandary dáleldener bolsa, olardyń árbirine 10 jyldan túrmede otyrý qaýpi tónip tur. Bul týraly ITAR-TASS habarlady.
«Aıyptalýshy Lında Meıott ózin 2005 jyldan beri eki jyldyń kóleminde qazaqstandyq jetkinshektiń zorlap kelgenin, onyń jynystyq qumarlyǵyn qanaǵattandyrýǵa qarsylyq bildirgen kezinde tunshyqtyrýǵa áreket jasaǵanyn aıtyp shaǵyndy» dep jazady osy tusta Worcester Telegram & Gazette gazeti. О́z kezeginde qazir 21-ge kelgen jas jigit bul baılanystyń bastamashyly áıeldiń ózi bolǵanyn, buǵan óziniń qarsylyq jasaı almaǵanyn aıtyp otyr.
«Ol meni udaıy baqylaýdy ustap otyrdy. Ol meni qalady, – deıdi Meıott sosyn. – Ol basqynshylyq ról oınady. Men bastamashyl bolǵanym joq». Áıeldiń aıtýynsha, sol kezderi 13 jasar jasóspirim ózin óte dóreki ustaǵan, eger bul jynystyq qalaýyn oryndamasa, polısııaǵa shaǵym jasaıtyn bolyp qorqytqan. Sózine qaraǵanda, ol basynda ózine shabýyldaýshy balaqaıdan qorǵanbaq bolǵan. Biraq moınynan shap berip ustap, qylǵyndyrmaqshy bolǵasyn, qarsylyǵyn qoıǵan. Aıtýy boıynsha, bul oqıǵanyń syrtqa shyǵyp ketpeýin qalaǵan. Sebebi, otbasyn buzyp alǵysy kelmegen. «Nátıjesinde men qarsylyq kórsetýdi qoıdym», – dedi áıel sot aldynda. Sol kezde advokat: «Nege?» degen suraq qoıady. Buǵan áıel: «Munyń bári bos tirlik bolar edi. Budan eshqandaı paıda bolmas edi» dep jaýap berdi.
Lında Meıottyń aıtýyna qaraǵanda, zorlaý oqıǵasy 2007 jyldyń kókteminde onyń ekiqabat bolyp qalǵany anyqtalǵanǵa deıin jalǵasyp kelgen. Keıin DNK testi bóbektiń bıologııalyq ákesi jasóspirim bala ekenin kórsetip bergen.
Áıel ózin aıyptaý oqıǵasynyń 2009 jyly asyrandy balanyń úıden áshekeıli zattardy urlap alǵany belgili bolǵannan keıin bastalǵanyn aıtady. Ol sondaı-aq bozbalanyń sol kezderi ózimen dostasyp júrgen qyzdyń úıine ketkisi keletinin aıtyp júrgenin de málimdedi. «Men ony úıime ákeldim. Oǵan óz súıispenshiligim men jaqsy tárbıe bergim keldi. Saǵan zalal keltirgenimen, ony jaqsy kórgiń keledi», dep jylaǵan áıel kóziniń jasyn súrtti.
Degenmen, okrýg prokýrorynyń kómekshisi Cherıl Rıddl aıyptalýshy Lında Meıottyń zorlaý deregi boıynsha birinshi ret polısııaǵa bergen túsiniktemesi men sottyń aldynda aıtyp otyrǵan myna sózderiniń bir-birimen qabyspaıtynyna nazar aýdardy.
Nortbrıdjde turatyn Lında men Djozef qazir ózderine taǵylyp otyrǵan aıyptaýlardyń bárin joqqa shyǵarýǵa umtylyp jatyr. Munyń aldynda Djozef Meıott óziniń 17 jasar qazaqstandyq qyzǵa zorlyq jasaǵanyn moıyndamaı otyr. Al onyń ókil qyzy ógeı ákesiniń ózin qasyna alyp jatýdy munyń 8 jasynda bastaǵanyn aıtqan. Sol kezde ata-analar búldirshin qyz jalǵyz jatýdan qorqady degen syltaýmen solaı etken kórinedi.
Osy oqıǵaǵa baılanysty erli-zaıyptylar 2009 jyly birinshi ret tutqynǵa alynǵan eken. Biraq sot 2010 jyly olardy jazyqsyz dep taýyp, qulyp astynan bosatyp jiberipti. Arada úsh jyl ótkennen keıin sot sol iske qaıtyp oralyp otyr.
Murat Aıtqoja.