Keshe tańerteń Máskeý metrosynyń “Sokolnıchıı” jelisindegi “Lýbıanka” jáne “Mádenıet parki” aıaldamalarynda arasyna 47 mınót salyp eki jarylys boldy. Aldyńǵysy tańǵy 07.52 saǵatta, sońǵysy 08.39 saǵatta jasaldy. Jarylys saldarynan barlyǵy 37 adam qaza taýyp, 65 adam jaralandy.Jarylysty jasaǵan jankeshti-áıelder kórinedi. Oqıǵa bolǵan jerden olardyń denesiniń bólshekteri men “shahıd belbeýiniń” fragmentteri tabylǵan. Bir nazar aýdararlyǵy – eki jarylys ta ekinshi vagonda júzege asyrylǵan. Aldyn ala jasalǵan qorytyndy boıynsha “Lýbıanka” aıaldamasyndaǵy jarylystyń kúshi – 3, sońǵysynyki 1,5 kg trotıldik balamaǵa teń. Bolǵan oqıǵalar boıynsha qylmystyq is qozǵaldy.
CNN telearnasynyń aıtýyna qaraǵanda, cheshen jankeshtileriniń bir saıtynda jarylystyń jaýapkershiligin moınyna alǵan habar jarııalanǵan. Biraq saıttyń ataýy aıtylmaıdy.
Reseı Federasııasynyń Prezıdenti D.Medvedev osy oqıǵaǵa baılanysty shuǵyl keńes ótkizip, teraktilerdiń aldyn alý sharalarynyń álsizdigin synǵa aldy. Qoǵamda tolqýǵa jol berilmeı, terrorızmge qarsy kúres kúsheıe túsýi kerek, dep ol áleýetti qurylymdar basshylarynyń aldyna qatań talap qoıdy.
Qazir qalada IIM men TJM birlese otyryp, tótenshe shtabtar qurǵan. Olardyń kúshimen “Výlkan” josparyn iske asyrý qolǵa alynyp otyr. Bul – osy kúnderi Máskeý kóshelerindegi tekseristerdiń kúsheıe túsetinin aıǵaqtaıtyn amaldar. Prezıdent adam quqyn aıaqasty etýge jol berilmesin dese de, Máskeý mılısııasy bul kúnderi kúsheıtilgen kezekshilikke kirisip ketti.
Aıta ketetin jáıt, Máskeý metrosynda mundaı terrorlyq akt 2004 jyldan keıin birinshi ret jasalyp otyr. Sol jylǵy 6 aqpanda jáne 31 tamyzda dál osyndaı jarylystar jasalyp, aldyńǵysynda – 41, sońǵysynda 8 adam opat bolǵan edi.