Mas kúıinde kólik aıdaǵan BQO turǵynynyń sot sheshimimen 2 jyl 6 aıǵa bas bostandyǵy shektelip, ómir boıy kólik júrgizý quqyǵynan aıyryldy.
13 qańtar kúni tún ishinde Jánibek aýylynyń kósheleriniń birinde «VAZ-21099» kóligimen kele jatqan 36 jastaǵy turǵyndy polısııa toqtatyp, júrgizýshiniń mas ekenin kórgen. Saraptama da onyń alkogoldi ishimdik ishkenin rastady. Kólik salonynda bos bótelke shashylyp jatypty.
- Osy quqyq buzýshylyǵy úshin ol turǵyn qylmystyq jaýapqa tartyldy. Jánibek aýdandyq sotynyń úkimimen oǵan 2 jyl 6 aıǵa bas bostandyǵynan aıyrý jáne kólik quraldaryn júrgizý quqyǵynan ómir boıy aıyrý jazasy qoldanyldy, - deıdi BQO Polısııa departamentiniń baspasóz hatshysy Bolatbek Belgibekov.
Bul azamattyń munshalyq qatań jazalanýynyń sebebi de bar eken: ol sot sheshimimen 2017 jyly da úsh jylǵa kólik júrgizý quqyǵynan aıyrylǵan, alaıda osyǵan qaramastan qylmystyq quqyqbuzýshylyqty qaıtalap otyr.
BQO Polısııa departamentiniń Tergeý basqarmasynyń dereginshe, bıylǵy bir aı ishinde polısııa qyzmetkerleri kólik júrgizý quqyǵynan aıyrylǵan, soǵan qaramastan mas kúıinde rólge otyrǵan 24 júrgizýshini ustapty. Onyń 13-i Oral qalasynda qolǵa túsken.
Aıta keteıik, Qazaqstanda mas kúıinde kólik júrgizý jaýapkershiligin kúsheıtetin zań bıylǵy 11 qańtardan bastap kúshine engen.
Batys Qazaqstan