iKOMEK109 qalalyq ortalyǵy Bilim basqarmasymen birlesip, elordalyq bilim berý mekemeleriniń sapasyn arttyrý boıynsha jumysty jalǵastyryp keledi. Jumys saparymen iKOMEK qalalyq ortalyǵyn Bilim basqarmasynyń ókilderi men Nur-Sultan qalasynda ornalasqan 90 mekteptiń dırektorlary kelip kórdi. Nur-Sultan qalasynyń Bilim basqarmasynyń basshysy Sholpan Qadyrovanyń tóraǵalyǵymen jıyn ótip, onyń aıasynda elorda turǵyndarynan kelip túsetin shaǵymdar men jaǵdaıattar qaraldy. Bul týraly Nur-Sultan qalasy ákimdiginiń baspasóz qyzmeti habarlady.
iKOMEK ortalyǵy basshysynyń orynbasary Dına Temirǵalıeva tanystyrý barysynda AQSh-taǵy 911 jáne 311 qyzmetterine uqsas qurylǵan elordalyq iKOMEK ortalyǵynyń jumysyn kórsetti, sonymen qatar, biz BIG DATA qaǵıdasymen jumys isteıtin taldaý platformasy, Qalany basqarý paneli, qaladaǵy ahýaldy baqylaýǵa arnalǵan mobıldi qosymsha, GPS-monıtorıng júıesi, ákimdik tıimdiliginiń úsh deńgeıli KPIs, ákimdik basshylary: aýdan ákimderiniń, ákim orynbasarlarynyń jáne basqarma basshylarynyń reıtıngisi sııaqty sıfrlyq bastamalarmen bólisti. Pılottyq rejimde iKOMEK mobıldi qosymshasyna 10 elordalyq mektep qosylǵan, onda olar onlaın rejimde bilim berý mekemesine qatysty barlyq ótinishti ala alady.
Sondyqtan azamattar ózderin alańdatqan suraqtarǵa tikeleı jaýap alady. «iKOMEK109 qalalyq ortalyǵy qaladaǵy ómir sapasyn jaqsartý jáne turǵyndar úshin qalalyq qyzmetterdiń sapasyn arttyrý boıynsha jumys júrgizýde. Sondyqtan biz elordada jaıly ómirdi qalyptastyrý, sonymen qatar, qala mektepterindegi qaýipsizdikti qamtamasyz etý úshin árbir jaýapty memlekettik organmen tyǵyz jumys isteımiz» dedi iKOMEK109 qalalyq monıtorıng ortalyǵy basshysynyń orynbasary Dına Temirǵalıeva. Áriptester búgingi tańda qala turǵyndarymen baılanysatyn biryńǵaı torap bolyp tabylatyn «iKOMEK109 biryńǵaı baılanys ortalyǵyn» qurý tájirıbesin joǵary baǵalady. Búgingi kezdesý qalanyń júıeli túıtkilderi reıtıngisinde jasaqtalǵan bilim salasyndaǵy júıeli máselelerdi sheshýde qoıan-qoltyq áreket etýge yqpal etedi.
Esterińizge sala keteıik, iKOMEK109 mobıldi qosymshasy qala turǵyndaryna ótinish berýge: foto-beınematerıaldy tirkeı otyryp, ótinish berýge, sonymen qatar, onyń atqarylý dárejesin bilýge; aldaǵy is-sharalar, mektepterde sabaq bolmaıtyny, tasjoldardyń jabylýy jáne t.b. jóninde bilýge múmkindik beretin habarlandyrýlarǵa jazylýǵa múmkindik beredi.