Tennıs. Jaqynda qazaqstandyq tennısshi Kámıla Kerimbaeva Ýkraınanyń Donesk qalasynda ótip jatqan tennısten ITF týrnıri irikteý kezeńiniń jeńimpazy atandy.
Tennıs. Jaqynda qazaqstandyq tennısshi Kámıla Kerimbaeva Ýkraınanyń Donesk qalasynda ótip jatqan tennısten ITF týrnıri irikteý kezeńiniń jeńimpazy atandy.
Endi ol Donesk qalasynda ótetin týrnırge qatysady. Týrnırdiń júlde qory 75 000 AQSh dollary. Osydan keıin ol Túrkııada ótetin jarysqa qatysýdy josparlap otyr. Mundaǵy júlde qory – 25 000 AQSh dollary. Hokkeı. Búgin Astanada «Nur Otan» HDP, Qazaqstan hokkeı federasııasy men «Barys» HK-nyń uıymdastyrýymen Qazaqstan Respýblıkasy Prezıdentiniń kýbogy jolynda halyqaralyq týrnır bastalady.
Bul synǵa jergilikti «Barys» pen Qurlyqtyq hokkeı lıgasynda óner kórsetetin «Iýgra» (Hanty-Mansı), «Amýr» (Habarovsk), «Vıtıaz» (Podolsk) komandalary qatysady. Onyń ashylý saltanaty «Qazaqstan» muz sport saraıynda ótse, oıyndary osy jerde 13 tamyzǵa deıin jalǵasady. Týrnırdiń ashylý saltanatyna «Nur Otan» HDP Tóraǵasynyń birinshi orynbasary Baýyrjan Baıbek qatysady dep kútilýde.
Týrnırdegi «Barys» klýbynyń oıyndary men fınaldyq kezdesýlerdiń bárin «KAZSPORT» jáne «KHL-TV» arnasy tikeleı efırde kórsetedi. Búgin jarystyń ashylý saltanatynan keıin muz aıdynyna «Barys» pen Habarovskiniń «Amýr» komandasy shyǵady. Onyń aldynda saǵat 14.00-de «Iýgra» men «Vıtıaz» kezdesedi. Al 10 tamyzda saǵat 14.00-de «Vıtıaz» ben «Amýr», saǵat 18.00-de «Barys» pen «Iýgra», 12 tamyzda saǵat 14.00-de «Amýr» men «Iýgra», saǵat 19.00-de «Barys» ben «Vıtıaz» kezdesse, 13 tamyzda saǵat 14.00-de úshinshi oryn úshin match, saǵat 19.00-de fınal ótedi.
Fýtbol. 11 tamyzda elordadaǵy «Astana-Arena» stadıonynda Qazaqstan jastar quramasy Eýropa chempıonatynyń irikteý kezeńinde Armenııa komandasyn qabyldaıdy. Match Astana ýaqyty boıynsha saǵat 19.00-de bastalady. Budan keıin, 14 tamyzda Qazaqstan ulttyq quramasy Grýzııa komandasymen joldastyq kezdesý ótkizedi. Bul oıyn saǵat 20.00-de bastalady. Eki kezdesýge de kirý tegin.
Sýǵa júzý. Osy aptada Astanadaǵy «Qazaqstan» sport keshenińde áskerı qyzmetshiler arasynda sýǵa júzýden chempıonat bolyp ótti. Oǵan Qazaqstan Respýblıkasy Qorǵanys mınıstrligi Ortalyq apparatynyń qurylymdyq bólimshelerinen, ásker túrleri men tekterinen, Aqmola óńirlik garnızonynda shoǵyrlanǵan áskerı bólimder men mekemelerden jasaqtalǵan 16 komanda qatysty.
Qorytyndyda áıelder arasynda Áýe qorǵanysy kúshteri Áskerı-áýe kúshterine qarasty 19132 áskerı bóliminiń kelisimshart boıynsha kishi serjanty E. Prıbytkova altyn medaldi ıelendi. Erler arasynda 30 jasqa deıingi jeke birinshilikte Áskerı-teńiz kúshteri bas qolbasshysy basqarmasynyń aǵa leıtenanty M. Ábilmájinov 100 metrlik qashyqtyqta 1 mınýt 18 sekýnd nátıje kórsetip, birinshi oryndy jeńip alsa, ekinshi oryndy 14776 áskerı bóliminiń leıtenanty E. Ǵalymjanuly ıelendi. Úshinshi oryn 55765 áskerı bóliminiń ókili kishi serjant A. Ibraevqa buıyrdy.
Jalpykomandalyq esepte júldeli birinshi oryndy Qazaqstan Respýblıkasy Qarýly Kúshteri Tyl basshylyǵy ıelense, ekinshi jáne úshin oryndardy 14776 áskerı bólimi men Áýe qorǵanysy kúshteriniń komandalary bólisti.
«Egemen-aqparat».