Taıaýda Qazaqstandaǵy BUU Balalar qorynyń (IýNISEF) ókili Artýr van Dızen IýNISEF pen el Úkimetiniń ınnovasııalar men sıfrlandyrýdy engizý boıynsha birlesken jumystary týraly aıtyp berdi. IýNISEF pen Qazaqstan Úkimetiniń yntymaqtastyǵynyń mańyzdy baǵyttarynyń biri – balalardyń quqyqtaryn qorǵaý isine ınnovasııalardy engizý.
– Bala quqyǵyn qorǵaýdy júzege asyrýda Qazaqstan Úkimetimen aradaǵy nátıjeli seriktestigimiz kópten jalǵasyp keledi. Bizdiń birligimizdiń negizgi sıpattarynyń biri – ınnovasııa. Sondyqtan bizdiń túrli ınnovasııalarmen jumys isteýimiz ben onyń balalardyń quqyqtaryn qamtamasyz etýdegi tıimdiligin zerdeleýimiz uzaq ýaqyttan beri júrgizilip keledi, – dedi A. van Dızen.
IýNISEF ókili sonymen qatar Qazaqstanda GIGA bastamasyn iske asyrý boıynsha IýNISEF-tiń aımaqtyq habyn ashý múmkindigin atap aıtty, ol orta bilim beretin mektepterdi joǵary jyldamdyqty ınternetpen qamtamasyz etýge jáne ınnovasııalyq startaptardy damytýǵa baǵyttalady. Bul týraly ol:
– Qazir sıfrly baılanys salasynda taǵy bir ınnovasııany engizý úshin bas keńesimizben jumys istegenimizge qýanyshtymyz. Bizdiń kózqarasymyz turǵysynan qarasaq, ınternetke tolyq qol jetkizbeıinshe jastardyń jumys isteýge, osy eldiń azamaty retinde, bolashaq ata-ana retinde qalyptasýǵa daıyn bolý múmkin emes. Sondyqtan Qazaqstandaǵy jáne aımaqtardaǵy árbir mektepke ınternet taratý úshin jergilikti Úkimetpen birlesip jumys istep jatyrmyz. Biz jastarǵa sapaly bilim alýǵa kómektese alamyz. Demek, olardyń eńbekke ornalasý múmkindigi artady, ózderi úshin nátıjeli bolashaq qura alady dep sanaımyz, – dedi.
Sonymen qatar A. van Dızen elimizdiń shalǵaı aýdandarynda nebári birneshe oqýshy bilim alatyn kishkentaı mektepter bar ekenin, olar úshin sapaly bilim alý ınternetpen tyǵyz baılanysty ekenin aıtty. Olar úshin bul baılanys quraly ǵana emes, oqý quralynyń da rólin atqarady.
Qazaqstanda júrgizilip jatqan sıfrly transformasııaǵa qatysty IýNISEF ókili elde úlken ilgerileý boldy, maqsatqa qol jetkizý úshin birneshe qadamdar ǵana qaldy dep sanaıdy.
– Menińshe, Qazaqstannyń ınternetpen tolyq qamtylýyna shyn máninde az ýaqyt qaldy. О́ıtkeni zor ilgerileý bar. Biz qazir jergilikti Úkimetpen jekemenshik sektordyń, ınternet provaıderlerdiń, qarjy sektorynyń «baılanystaǵy sońǵy olqylyqtar» (the last mile connectivity gap) dep atalatyn problemany sheshý tóńireginde jumys atqarýdamyz, 100 paıyzǵa qol jetkizbes osy problemany sheshýimiz kerek. Meniń oıymsha, eger birlesip kúsh salsaq, jekemenshik jáne memlekettik seriktesterdiń jaqyndasýynda kreatıvti jáne ınnovator bola alsaq, biz bul kemshilikti joıa alamyz, – dedi A. van Dızen.
Mundaı nátıjelerge Qazaqstan Úkimetiniń sıfrlandyrý jáne ınnovasııalardy engizý boıynsha durys qurylǵan jumysynyń nátıjesinde qol jetkizildi.