Qazaqstanda 17 mln. teńgeniń munaıyn urlaǵan qylmystyq top ustaldy. Bul týraly búgin baspasóz máslıhaty barysynda Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaev málimdedi.
«Munaı jáne munaı ónimderiniń zańsyz aınalymy da qylmystyq toptardyń baıý kózderiniń biri bolyp otyr. Ońtústik Qazaqstan oblysynda munaıdy qubyr arqyly urlaýmen aınalysqan uıymdasqan qylmystyq toptyń 10 múshesi qamaýda sot úkimin kútip otyr. Olardyń ishinde qubyrlardy kúzetýge mindetti «SEMSER Securiti» kúzet agenttigi» JShS dırektory N.Moltaev ta bar», - dedi M.Jumanbaev.
Qylmystyq istiń materıaldary boıynsha atalmysh top músheleri 2012 jyldyń shilde-jeltoqsan aralyǵynda 17 mln. teńgeden astam somaǵa 4000 tonna kóleminde shıki munaıdy satý maqsatynda jasyryn túrde urlaǵan. Olar munaıdy «Qumkól – Pavlodar –Shymkent» qubyry arqyly urlap, tasymaldap saqtaǵan.
Sonymen qatar, Qarjy polısııasy agenttigi men Atyraý, Aqtóbe jáne Batys Qazaqstan oblystary departamentteriniń qyzmetkerleri kólemdi operasııa nátıjesinde 2012-2013 jyldary munaıdyń zańsyz aınalymy salasynda qyzmet etken qylmystyq topty áshkerelegen.
«Qazaqstannyń 6 azamaty men Moldova Respýblıkasynyń 2 azamatynan turatyn top Aqtóbe oblysynda ken oryndarynan jalpy kólemi 739 tonna munaı urlaǵan», - dep toqtaldy Jumanbaev.
Onyń aıtýynsha, urlanǵan munaıdyń 365 tonna bóligi pesh janar-jaǵar maı túrinde alys shet elderge eksportqa shyǵarylǵan. Qalǵan 2-shi bóligi, ıaǵnı 373 tonna munaıdy jiberý kezinde qylmystyq toptyń barlyq músheleri ustaldy. Olar sot sanksııasymen qamaýǵa alynǵan.
«Qylmystyq toptyń basshysy Kamalýtdınov jáne onyń sybaılasy «Bimol Oil» JShS dırektory Izımov qamaýǵa deıin qarjy polısııasy qyzmetkerlerine para berý arqyly osy qylmystyq toptyń qyzmetin tekserýdi toqtatýǵa áreket jasaǵan. Bul faktiler bekitilip, olar boıynsha qylmystyq ister qozǵaldy. Tekseristi toqtatý jáne osy topqa ári qaraı qamqorlyq jasaý úshin 755 myń teńge somasynda Atyraý oblysynyń qarjy polısııasy qyzmetkerlerine, oǵan qosa 630 myń teńge somasynda Aqtóbe oblysynyń qarjy polısııasy qyzmetkerlerine para berý faktileri boıynsha qylmystyq ister qozǵaldy», - dep túsindirip ótti resmı ókil.
Qurysh Nurymbet.