Shymkenttegi eń kórikti demalys orny bolady dep kútilgen Qoshqar ata ózenin abattandyrý jumystary bastaldy. Bul týraly oblys ákiminiń baspasóz qyzmeti habarlady.
Bıyl demalys aımaǵy qurylysynyń alǵashqy kezeńi júzege asyrylady. Bul kezeńde Qoshqar ata ózeni bastaýynan Ordabasy alańyna deıingi 16 gektar jer tolyq kóriktendiriledi. Onyń jobalyq-smetalyq qujaty ázirlenip, memlekettik saraptamadan ótti. Jobany daıyndaýǵa oblystyq bıýdjetten 15 mln. teńge qarjy jumsalypty. Al qurylysqa qajetti 452 mln. teńge qarjy qala bıýdjetinen bólingen.
- Demalys aımaǵy qurylysy barysynda Qoshqar ata ózeni jaǵalaýyndaǵy bekitý plıtalary, jaıaý júrginshilerge arnalǵan joldar da tolyq jańalanbaq. Sondaı-aq munda demalýshylarǵa arnalǵan kıim aýystyratyn arnaıy jabdyqtalǵan oryn qarastyrylyp, tynyǵatyn oryndyqtar da ornatylady. Aımaqta boı kóteretin jańa eki qabatty keńse ǵımaratynda medısınalyq beket pen sý qutqarýshylary ornalaspaq. Kógaldandyrý baǵytynda aǵash kóshetteri men ásem gúlder otyrǵyzylady, - deıdi ýchaske proraby Járdem Jumaǵazıev. Shomylatyn qaýyz, kishigirim jaǵajaı, sport alańdary. Qoshqar ata ózeniniń bolashaqtaǵy kórinisi osyndaı bolmaq.
Qoshqar ata ózeni bastaý alatyn bulaq mańy qazir qyzý qarbalas jumystarǵa toly. Munda sý qoqystan tazartylyp, qazý jumystary júrgizilýde. Demalys aımaǵyn kógaldandyrý jumystary 10 aı ýaqyt ishinde tolyǵymen aıaqtalýy tıis. Konkýrsty jeńip alǵan «Lıder NK» merdiger mekemesi qazirgi tańda kópir joldaryn retke keltirip, kógaldandyrý jumystarymen aınalysýda. Mekeme ınjeneri Nuraly Rashıdov sapaly ári keń aýqymda júrgizilip jatqan jumystardyń óz merziminen keshikpeıtinine senimdi. Al jergilikti turǵyndar qalanyń sáýletine ózgeshe lep ákeler demalys aımaǵynda serýen quratyn sátti asyǵa kútip júr.
Murat Aıtqoja.