Qazaqstan Prezıdentine Qarýly Kúshterdi qalyptastyrý jáne damytý, qorǵanys salasynyń shyǵyndaryn ońtaılandyrý jumystary týraly baıandaldy. Bul týraly Aqordanyń baspasóz qyzmeti habarlady
Mınıstrdiń aıtýynsha, júrgizilgen taldaý jumystary men shtabtyq-uıymdastyrý sharalary bıyl 10 mıllıard teńge únemdeýge múmkindik beredi.
Nurlan Ermekbaev Qasym-Jomart Toqaevqa armııany zamanaýı qarý-jaraqpen jabdyqtaý, áskerı tehnıkalardy jóndeý jáne jańǵyrtý jónindegi jospary, sondaı-aq, elektrondy áskerı komıssarıat jobasyn engizý úderisi týraly aıtty.
Kezdesýde Arys qalasynda bolǵan tótenshe jaǵdaıdyń saldaryn joıý jáne oq-dári saqtaý ınfraqurylymyn jetildirý úshin júrgizilgen jumystarǵa basa mán berildi.
Memleket basshysy Qorǵanys mınıstrine halyqaralyq áskerı-tehnıkalyq yntymaqtastyqty nyǵaıtý, armııany tıimdi ári básekege qabiletti qarý-jaraqpen jabdyqtaý, áskerı bilim berý isiniń jáne áskerı daıyndyq úderisiniń sapasyn arttyrý, sonymen qatar, áskerı paradqa daıyndyq barysy jóninde birqatar tapsyrma berdi.