Keshe Premer-Mınıstr Serik Ahmetov Qurylysshylar kúnine arnalǵan saltanatty jınalysqa qatysty. Onda Úkimet basshysy qurylysshylardy kásibı merekelerimen quttyqtap, qurylys salasynyń bir top qyzmetkerlerine nagradalar tapsyrdy.
Keshe Premer-Mınıstr Serik Ahmetov Qurylysshylar kúnine arnalǵan saltanatty jınalysqa qatysty. Onda Úkimet basshysy qurylysshylardy kásibı merekelerimen quttyqtap, qurylys salasynyń bir top qyzmetkerlerine nagradalar tapsyrdy. Serik Ahmetov jınalysqa qatysýshylarǵa arnaǵan sózinde Memleket basshysy alǵa qoıǵan Qazaqstandy álemdegi yrǵaqty damýshy elder qataryna shyǵarýdaǵy mindetterdi tabysty oryndaýǵa salanyń qosqan úlesin atap kórsetti.
Qurylys salasy memleket ekonomıkasynyń mańyzdy quramdastarynyń biri. Onyń ishki jalpy ónimdegi úlesi 6 paıyzdan astamdy quraıdy. Kóptegen jaǵdaıda dál osy qurylys qarqynynyń ósýi elimizdiń damýy men ál-aýqatynyń ındıkatory bolyp tabylady, dedi Premer-Mınıstr óz sózinde.
Búginde qurylysshylar jumysy yrǵaqty alǵa basýymen jáne eldiń búkil óńirlerinde qurylys kóleminiń artýymen sıpattalady. «Qoljetimdi turǵyn úı-2020» baǵdarlamasy sheńberinde ótken jyly 6,7 mıllıon sharshy metrden astam, al ústimizdegi jyldyń birinshi jartyjyldyǵynda 3 mıllıon sharshy metrden astam turǵyn úı paıdalanýǵa berildi.
2013 jyly arendalyq turǵyn úı qurylysyna 27,5 mıllıard teńge, turǵyn úı qurylys jınaq salymdary júıesi boıynsha nesıelik turǵyn úı qurylysyna 30 mıllıard teńgeden astam qarjy qarastyrylǵan.
Turǵyn úı qurylystary júrip jatqan aýdandarda ınjenerlik-kommýnıkasııalyq ınfraqurylym salýǵa respýblıkalyq bıýdjetten 40 mıllıard teńgeden astam qarjy bólindi.
Bul aıtylǵandardyń syrtynda, ótken jyly «QIK» AQ arqyly turǵyn úı qurylysynyń jańa baǵyttary bastaý aldy. Onyń sheńberinde jyl saıyn shamamen 500 myń sharshy metr turǵyn úı salý josparlanyp otyr.
Turǵyn úı qurylysyn odan ári damytý úshin eldiń oblys ortalyqtarynda qazirgi zamanǵy úı qurylysy kombınattaryn iske qosý jobalary ázirlenýde. Bul kombınattar iri paneldi jáne qurastyrmaly-qańqaly úı qurylysy tehnologııasyn paıdalaný arqyly qurylys merzimderin aıtarlyqtaı qysqartýǵa jáne paıdalanýǵa beriletin turǵyn úı kólemin arttyrýǵa jaǵdaı jasaıdy, dedi S.Ahmetov.
О́tken jyly biz qurylysqa beriletin memlekettik qurylys lısenzııasyn kategorııalaý ınstıtýtyn ómirge ákeldik. Sarapshylardyń jobalaý salasyndaǵy, avtorlyq jáne tehnıkalyq qadaǵalaýdaǵy derbes jaýapkershiligin engizdik, ol, sóz joq, jobalanǵan jáne júrgizilip jatqan qurylys-montaj jumystarynyń sapasyn arttyratyn bolady, degen senim bildirdi Premer-Mınıstr osy oraıda.
Úkimet basshysy sondaı-aq qurylys salasy aldynda turǵan birqatar mindetterdi de atap kórsetti. Premer-Mınıstrdiń paıymdaýynsha, qurylysshylar salynyp jatqan úıler men ǵımarattardyń sapasyn arttyrýǵa, kóptegen mańyzdy jobalardyń, sonyń ishinde, Qazaqstandy ındýstrııalyq-ınnovasııalyq damytý jáne áleýmettik jańǵyrtý sheńberindegi jobalardyń oryndalýyn qamtamasyz etýge barynsha kúsh-jiger jumsap, sonymen birge, qurylystaǵy tehnıkalyq retteý júıesin reformalaý, eýrokodtaý jáne basqa da halyqaralyq standarttardy engizý jónindegi jumystardy odan ári jalǵastyrý qajet.
Serik Ahmetov qurylys kesheniniń áleýetin arttyrý jáne ondaǵy qyzmetkerlerdiń joǵary kásibıligi bolashaqta da Memleket basshysy alǵa qoıǵan mindetterdi júzege asyrýda tabysqa jetýge jaǵdaı jasaıdy degen óz senimin bildirdi.
Saltanatty jınalysta «Qulager» kompanııasynyń basqarma dırektory Galına Iаshenko jáne «BI-Progect» kompanııasynyń bólim bastyǵy Altynbek Shaıahmetov qurylys salasy qyzmetkerleri atynan sóz sóıledi.
Seıfolla ShAIYNǴAZY,
«Egemen Qazaqstan».