О́.Sultanǵazın atyndaǵy Qostanaı memlekettik pedagogıkalyq ýnıversıtetindegi Bıznes-ınkýbatorde stýdentter 20 jobany júzege asyryp jatyr.
Olar tek pedagogıka emes, ómirdiń barlyq salasy boıynsha ózekti máseleler men jańalyqtardy qamtıdy. 2019 jyldyń naýryz aıynda bilim ordasynda Bıznes – ınkýbator U – Smart ınnovasııalyq bólimshesi ashylǵan bolatyn. Ol jobasyn qolyna alǵan stýdentterge ıdeıalyq bastamasynan bastap, nátıjesin kórgenge deıin kómek beredi. Búginde onda 50 rezıdent pen 19 bilim baǵdarlamasy ókilderi kásipkerliktiń qyr-syryn úırenip júr. Bilim ordasy qabyrǵasynda júrip-aq rezıdentter ózderi jasaǵan jobalarda aqparattyq bilim salasyn, ınklıýzıvtik keńistikti damytýdy, óńdeý ónerkásibin, medıa, mádenıet jáne bıznesti qamtıdy. Elimizdiń pedagogıkalyq joǵary oqý oryndary arasynda mundaı ortalyqtyń balamasy joq.
Az ýaqyttyń ishinde ýnıversıtettegi Bıznes – ınkýbator U – Smart ortalyǵy óziniń jetistigimen kásipkerlik qoǵamdastyqqa da belgili bola bastady. Stýdentter ózderiniń qyzyqty bastamalarymen Qazaqstannyń onshaqty qalasynda boldy. Almaty qalasynda ótken halyqaralyq GoViral festıvalinde rezıdentter Aıdana Ydyrysova men Sultan Qojamberdıev AQSh dıplomatııalyq mıssııasynan óńirlik ambassadorlar atandy. Al Qazaqstan mádenıeti jóninde aǵylshyn tilinde balalarǵa sabaq úıretýge arnap mýltfılm jasaǵan stýdent Dıana Temirhanovanyń «Wonder 7» jobasy Pavlodar qalasynda ótken Qazaqstan rektorlar keńesi aıasyndaǵy sharada qarjylandyrýǵa usynyldy. Bilim ordasynda mundaı mysaldar jetkilikti.
U-Smart ortalyǵyna kelgen stýdent ózin jan-jaqty synaıdy, ózin bıznes álemine daıyndaıdy, kóshbastaýshy qabiletin ushtaı túsedi.
QOSTANAI