18 aqpan kúni Úndistanda kúres túrlerinen Azııa chempıonaty bastalady. Qurlyq dodasynda el namysyn qorǵaıtyn Dáýlet Nııazbekov aldaǵy týrnırge qatysty pikirimen bólisti. Bul jaıynda Ulttyq olımpıadalyq komıtettiń baspasóz qyzmeti habarlady.
«Chempıonatqa daıyndyq óte jaqsy deńgeıde. Qazirgi tańda ekinshi oqý-jattyǵý jıyndaryn ótkizip jatyrmyz. Azııa chempıonaty Olımpıada qarsańyndaǵy eń mańyzdy, óz áleýetimizdi taǵy bir tekserip alatyn týrnır. Onyń ústine, bul básekede reıtıngilik upaı beriledi. Sondyqtan Úndistandaǵy týrnır bárimiz úshin de asa qajet. Qarsylastar da qarymdy. Kilem ıesi Úndistannan bólek, Japonııa, Iran, О́zbekstan balýandary bar. Biz bar kúshimizdi salamyz», - deıdi D. Nııazbekov.
Aıta ketelik, Dáýlet Nııazbekov búginge deıin Azııa chempıonatynda úsh ret top jaryp, úsh márte qola júldeger atanǵan.