Megapolıste munan bylaı PIK-terdiń ornyna MIB, ıaǵnı Múlik ıeleriniń birlestigi men qarapaıym seriktestik (QS) jumys isteıtin bolady. Bul týraly Almaty qalasy ákimdiginiń baspasóz ortalyǵynda qalalyq Turǵyn úı saıasaty basqarmasy basshysynyń orynbasary Meıirjan Otynshıev málimdedi.
«Kondomınıým nysanyn basqarý organdarynyń qyzmetin retteý maqsatynda «bir úı – bir birlestik – bir shot» qaǵıdaty boıynsha múlik ıeleriniń birlestigi kommersııalyq emes uıymynyń jańa formasy quryldy. Ol árbir úıdi basqarýda jeke ádis qoldanýdy kózdeıdi. Sondaı-aq turǵyndarǵa aqsha túsimin jáne olardyń jumsalýyn monıtorıngileý múmkindigimen óz úıin ustaýǵa qarajat jınaýǵa múmkindik beredi», - dedi Meıirjan Otynshıev.
Eger buryn PIK, KT, PITK, JShS jáne t.b. basqarý organdary birneshe úıdi basqaryp, barlyq úıge bir shot ustasa, endi bul uıymdar úı Keńesimen almasady. Úsh menshik ıesinen turatyn keńes ár aı saıyn turǵyndar aldynda esep beretin bolady.
Múlik ıeleriniń birlestigi (MIB) – zańdy tulǵa. Ony basqaratyn tóraǵa menshik ıeleri qatarynan bir jylǵa saılanady. Bul rette, shtatta aýla sypyrýshylar, elektrıkter, santehnıkter sııaqty qyzmetkerler bolmaıdy. Bulardyń qyzmetin shart boıynsha servıstik qyzmet kórsetetin uıymdar oryndaıdy.
Qarapaıym seriktestik (PT) – zańdy tulǵa bolmaı-aq barlyq menshik ıelerimen tikeleı birlesip basqarý, ıaǵnı menshik ıeleri jarnalardy aqshalaı nemese eńbek salymy arqyly engizedi.
«Bul rette menshik ıeleri óz quramynan barlyq menshik ıeleri bergen qarapaıym jazbasha senimhat negizinde senimdi tulǵany anyqtaı alady», - deıdi Turǵyn úı saıasaty basqarmasy basshysynyń orynbasary.
Jańa basqarý nysanyna óte otyryp menshik ıeleri ózine tıesili páter aýyrtpalyǵyn kóteredi, turǵyn emes úı-jaıdyń, sondaı-aq kondomınıým nysanynyń ortaq múlkine jaýapkershilikti óz moınyna alady. Osyǵan baılanysty MIB tóraǵasy qarapaıym seriktestiktiń senim bildirgen adamy ekinshi deńgeıdegi bankterde aǵymdaǵy jáne jınaq shottaryn ashady. Osylaısha Almatyda 900 PIK-tiń ornyna 8,4 myńnan astam basqarý organdary paıda bolady. Sonymen qatar, menshik ıeleri bir jyldyń ishinde úı Keńesin saılaý jáne kondomınıým nysanyn basqarý formasyn tańdaý úshin jınalys ótkizýi tıis.
Qoldanystaǵy PIK, KT, PITK 2022 jyldyń 1 shildesine deıin basqarý jónindegi qyzmetti júzege asyrýǵa quqyly. Sonymen qatar bir mezgilde basqarýshy nemese servıstik kompanııalarǵa taratý nemese qaıta uıymdastyrý rásimin de júrgize alady.