Almaty arnaıy aýdanaralyq ákimshilik sotynyń sheshimimen «Pravda Kazahstana» gazetiniń taralymy tárkilendi. Bul týraly «Ádil sóz» halyqaralyq sóz bostandyǵyn qorǵaý qorynan habarlady.
«9 tamyzda Almaty qalasy arnaıy aýdanaralyq ákimshilik sotynyń sýdıasy Ǵalym Keldibaev «Pravda Kazahstana» gazetiniń bas redaktory Shárip Quraqbaev pen basylymnyń ıesi – Qazaqstan kompartııasyn QR Ákimshilik isteri kodeksiniń 350-baby 1-bóligi boıynsha «shyǵarylý málimetterin jarııalaý tártibin buzý» degen aıyptady», - delingen qordyń habarlamasynda.
Buǵan basty sebep, gazet taralymy shyǵarý málimetterinde kórsetilgendeı, 8 myń emes, 7 myń dana bolyp shyqqan.
«Taralym tárkilenip alyndy, al bas redaktor men partııa tıisinshe 5 jáne 20 eń tómengi aılyq mólsherindegi aıyppulǵa tartyldy», - túsindiredi paraqsha.
Sot otyrysy barysynda Sh.Quraqbaev taralymnyń ózgertilip kórsetilýine adam faktory áser etkenin málimdedi: redaksııa 3 aı boıy jumyssyz turǵannan keıin qatarǵ jańa qyzmetkerler alýǵa májbúr bolǵan, solar taralym málimetin ózgertýdi umytyp ketken. Alaıda, sot bul ýájdi qaperge almady.
Habarlamada ákimshilik óndiristiń Almaty qalasy ishki saıasat basqarmasynyń shaǵymy boıynsha qozǵalǵany aıtylǵan.
Sáken Maılybaı.