Qostanaı oblysynyń Áýlıekól aýdany Amanqaraǵaı kentinde jasy kámeletke tolmaǵan qyzdy zorlady degen kúdikpen polısııa kapıtany qamaýǵa alyndy. Bul týraly «Nasha gazeta» habarlady.
Bolǵan oqıǵa jaıynda Qostanaı oblystyq ishki ister departamenti qaýipsizdik basqarmasynyń bastyǵy Jarashan Aqberdıev ınternet-máslıhatta aıtyp berdi.
«Ústimizdegi jylǵy 4 shildede Áýlıekól aýdanyndaǵy Amanqaraǵaı kentinde óz qyzmetin atqaryp júrgen polısııa kapıtany, ýchaskelik ınspektor tirek beketine keshki ýaqytta eresekterdiń qaraýynsyz qalyp qoıǵan eki kámeletke tolmaǵan qyzdy alyp keledi. Ol qyzdardy bólek kabınalarǵa ornalastyrady. Solardyń bireýin qorqytyp, zorlap jiberedi. Osyǵan baılanysty 6 shildede qylmystyq is qozǵaldy. Qazir polısııa kapıtany qamaýda otyr», dep túsindirdi J.Aqberdıev.
Taıaý kúnderde qylmystyq is sotqa joldanady. Polısııa kapıtanynyń munda kezekten tys attestattaýdan keıin kelgeni de belgili boldy. Ol byltyrǵy jyly ótken synaqtan keıin atalmysh eldi mekenge oblystyq ishki ister departamenti esirtki bıznesine qarsy kúres basqarmasynan kelgen bolyp shyqty.
Aıtqandaı, osy kúnderde onyń burynǵy áriptesteriniń birqatary esirtki saýdasyna «qorǵan» bolyp júrgeni úshin qolǵa túsipti. Jaqyn aralyqta olardyń da isteri sotta qaralady.
Qurysh Nurymbet.