Han Táńiriniń muzart shyńy menmundalap turatyn dala atyrabynda aqıyq aqyn Muqaǵalı Maqataev jyrlamaǵan jylǵa da, qyr men orman da joq.
Týǵan jerdiń qasıetti topyraǵyna deıin aıalaı jyryna qosqan aqynnyń árbir óleń jolynda mahabbat pen saǵynyshtyń taby jatqany haq. Aqynnyń týǵan kúni ózi týyp ósken Qarasaz mańynda móldirep aǵyp jatatyn Qarasýǵa alty aqqýdyń qonýy jyrǵa qumar ólkeni eleń etkizgeni anyq. Osynaý erekshe kórinisti tamashalaǵanda aqıyq aqyn jyrlaǵan myna bir jyr shýmaqtary eriksiz oıǵa oralady.
Beý, dúnıe-aı, aqqýlar oralǵanda,
Aıdyn kóldiń ıesi jol alǵanda.
Jetisip bir «Jetim kól» qalýshy edi-aý,
Tynýshy edi-aý, teńselgen qara orman da.
Taıanǵanda aqqýlar qonar mańǵa,
Basýshy edi-aý, baıyzyn bar arman da!
Qanatynan aqqýdyń balapandap,
Ən ushatyn sympyldap tań atarda.
Súıinshi ber degendeı bir tolyqsyp,
Sybyrlaıtyn «Jetim kól» Alataýǵa.
Tyna qalyp bulbul da jaǵa-talda,
Qaraı-tuǵyn aıdynǵa, aq otaýǵa.
Tań men kúnniń arasy taıanǵanda,
Taýdyń basy alaýmen boıalǵanda,
Tiriletin taýdaǵy bar tirshilik,
Qanatynan aqqýdyń oıanǵan ba?!
Bul tosyn kórinisti qarasazdyqtar aqıyq aqynnyń keler jyly týǵanyna 90 jyl tolýynyń habarshysyndaı qabyldap, jaqsylyqtyń jarshysyna balap otyr. «Aqqýlardyń Muqaǵalı aǵamyzdyń týǵan kúni 9 aqpanda kelip qonýy Qarasaz halqyna erekshe jiger bergendeı. Búgingi urpaq rýhanı kelbeti ult bolmysyn aıshyqtap turǵan Alashtyń alyp temirqazyǵyna aınalǵan tuǵyrly tulǵa Muqaǵalıdy eshkimge uqsamaıtyn, eshkimdi qaıtalamaıtyn, injý-marjan sóz qudiretin óz órnegimen erekshelegen shynaıy poezııa ókili retinde tanydy. Qazaqtyń qarapaıym tiliniń nári men mánin Abaıdan keıin túsindirip ketken, qazaqtyń óleńin mazmun men pishin jaǵynan túrlentken aqyn Muqaǵalıdyń murasy ıgiligimiz ǵana emes, qasterlep qadirleıtin qazynamyz», deıdi áserli áńgimesinde Qarasaz aýylynyń turǵyny, ustaz Ádiljan Nókeev.
Týǵan Qarasazyna aqıyq aqynnyń sálemin jetkizýge kelgendeı, alty aqqý aıdyn betinde qıqýlaı syrǵyp barady. Al aqpannyń appaq qary aıdyn kólmen erekshe jarasym tapqan.
Almaty oblysy