Aýyl, qala ákimderiniń alǵashqy saılaýy serpinmen ótti. Oǵan barlyǵymyz da nemketti qaraı alǵan joqpyz, eleńdep otyrdyq. Sebebi, eldi mekenderde aýyl ákimderine kóp másele baılanysty. Ár turǵyn óziniń basyn aýyrtqan jaǵdaıyn Prezıdentke, Úkimetke, oblys ákimine tikeleı baryp aıtpaıdy ǵoı. Aýyl ákimi memleket saıasatyn ár adamǵa jetkizýshi, dáneker. Sondyqtan aýyldastar aldymen aýyl ákimine júginedi.
Aýyl, qala ákimderiniń alǵashqy saılaýy serpinmen ótti. Oǵan barlyǵymyz da nemketti qaraı alǵan joqpyz, eleńdep otyrdyq. Sebebi, eldi mekenderde aýyl ákimderine kóp másele baılanysty. Ár turǵyn óziniń basyn aýyrtqan jaǵdaıyn Prezıdentke, Úkimetke, oblys ákimine tikeleı baryp aıtpaıdy ǵoı. Aýyl ákimi memleket saıasatyn ár adamǵa jetkizýshi, dáneker. Sondyqtan aýyldastar aldymen aýyl ákimine júginedi.
Saılaýdan buryn da osy laýazymǵa laıyqty jandar taǵaıyndalyp júrdi. Al myna demokratııalyq qadam qoǵamdy serpiltip tastady ári attyń belin tartqandaı, aýyl ákimderiniń jaýapkershiligin taǵy bir nyqtap qoıdy. Aýyl, qala, poselke ákimderiniń saılaýy elge kelip jatqan jaqsy ózgeris ekeninde daý joq. Turǵyndar muny bilip otyr. Ár úmitker óz baǵdarlamasyn jasady, halyq saılaǵan depýtattar olardyń barlyǵymen tanysty. Ár baǵdarlamada aýyl-selony kórkeıtýdiń tamasha úlgileri bolǵanyna meniń senimim kámil. Bizdiń Qostanaı aýdanynda 40 kandıdattan aýdandyq máslıhat depýtattary 20 ákimdi tańdap aldy. Barlyǵy da qolynan is keletin azamattar.
Meniń ómirim aýylda ótip keledi. Balalarǵa sapaly bilim berýdiń qyzyǵy men shyjyǵyn arqalap júrmiz. Eldiń ishinde barlyǵy da bir-birine tonnyń ishki baýyndaı baılanysty. Jurttyń turmysy jaqsarmasa, balanyń bilimi men tárbıesi de biz oılaǵandaı deńgeıde bolmaıdy. Al bala – elimizdiń erteńi. Búginde aýyldaǵy jumyssyzdyq, aýyzsý, maldyń jaıylymy, otyn-sý, jol sııaqty tolyp jatqan túıindi máseleler bar. Osylardyń barlyǵyna aýyl ákiminiń basy aýyrady, atqarylǵan istiń basy-qasynda júretin de sol. Bıyldan bastap aýyl ákimderiniń óz bıýdjeti bolady. Endi ákimder jergilikti jerdegi egin egetin, mal ustaıtyn kásipkerlerge alaqan jaıa bermeı, kóp máseleni ózi qarjylandyratyn bolady.
Saılanǵan azamattar bıýdjet máselesine myqty bolsa eken deımin. Bul salyqtyń birneshe túrinen ǵana túsetindikten, asa kóp qarjy da bolmaýy múmkin. Biraq, ol túskenine emes, ony halyqtyń qajetine adaldyqpen, tıimdilikpen jumsaýyna baılanysty. «Aýylyna qarap azamatyn tany» degen qanatty sóz bar ǵoı. Endi ákimi qandaı bolsa, aýyly da sondaı bolady. Qazirdiń ózinde osyndaı kórinister jeterlik. Keıbir aýyldardyń qoqysy úıdiń arasynda, joldyń ústinde jatady. Isker ákim mundaıǵa jol bermeıdi. Maldyń kóńi men peshtiń kúlin aýyldyń syrtyna shyǵaryp, zalalsyzdandyrýǵa nıet etken azamat qarjy tabady. Jaqsy ákimdi aýyldastary syılaıdy, syılaǵan jerde onyń sózin de eshkim jerge tastamaı tyńdaıdy. Bul onyń aýyldastarymen qalaı jumys isteı alatynyna baılanysty. Ákimder saılaýynan soń eldiń ishinde jańa kóılek kıgendeı, rýhanı serpilis bar. Bári de ákimderden ıgilikti is kútip otyr.
Janǵutty SARTOV,
N.Naýshabaev atyndaǵy orta mekteptiń dırektory,
Zatobol kentiniń turǵyny.
Qostanaı oblysy.