Qazaq ulttyq qyzdar pedagogıkalyq ýnıversıtetiniń stýdentteri WikiGap Kazakhstan jobasyna qatysýda. Bul joba túrli sala boıynsha jetistikke jetken qazaqstandyq áıelder týraly onlaın kitaphanany qurýǵa baǵyttalǵan.
Igilikti bastama Nıderlandy Koroldiginiń Qazaqstandaǵy Elshiliginiń qoldaýymen oqý orny janyndaǵy Áleýmettik jáne genderlik ǵylymı-zertteýler ınstıtýtynda júzege asyrylýda.
WikiGap Kazakhstan jobasy segiz baǵytty qamtıdy. Atap aıtqanda, bilim, ǵylym, óner, saıasat, bıznes, medıa, úkimettik emes sektor men sport salasyndaǵy tanymal 100 qazaqstandyq áıel týraly aqparat Wikipedia ǵalamtor ensıklopedııasyna qazaq, orys jáne aǵylshyn tilderinde ornalastyrylmaq.
Uıymdastyrýshylardyń aıtýynsha, joba barysynda stýdentter ózderi jetik meńgergen tilderdiń birinde qajetti málimetti daıyndap, onlaın ensıklopedııaǵa ornalastyrady. Wikipedia jelisine maqalany ornalastyrý úshin IT mamandardyń arnaıy trenıngteri ótedi. Joba bıylǵy naýryz aıyna deıin jalǵaspaq. Halyqaralyq áıelder kúni qarsańynda arnaıy jıyn ótip, jobaǵa belsendi qatysqandar sertıfıkatpen jáne usynys hatpen marapattalady.
– Bul jobanyń Qazaqstan úshin paıdasy kóp dep oılaımyz. Basty maqsat – esimi kópshilik úshin beımálim dese de óz salasy boıynsha tabysqa jetken názikjandylardy keńinen nasıhattaý, ınternet keńistikte olar týraly aqparatty qoljetimdi etý. Osyndaı ıgilikti iske atsalysýǵa Qyzdar ýnıversıtetiniń stýdentterin shaqyramyz, - deıdi Áleýmettik jáne genderlik ǵylymı-zertteýler ınstıtýtynyń mamandary.
Jandar ASAN