21 aqpan – álemde «Halyqaralyq ana tili kúni» bolyp belgilengen. Osy dataǵa oraı Soltústik Qazaqstan oblystyq Tilderdi damytý basqarmasy Qyzyljardaǵy eń záýlim mádenı oryn – «Oqýshylar saraıynda» «Urpaq tili-keleshek kilti» atty úlken mádenı shara ótkizdi.
«Ana tiline» arnaıy kún berip ardaqtaý ásirese,biz sııaqty ony jetkilikti dárejede qurmettemeıtin halyq úshin kerek-aq. Qazir ana tilinde oqıtyn balalar, olardyń ata-analary óz tilderine degen qurmetti umytyp, ózge tilde shúldirleýge áýes. Al áýezdi, óte baı, óte qunarly, óte qudiretti qazaq tili ókinishke oraı, keıingi kezekke syrǵyp barady.
Atalmysh shara memlekettik tildi meńgergen ózge etnos ókilderiniń qazaq tilin úırenýi men onyń bolashaǵyna degen kózqarasyn bildirip, oılaryn ortaǵa salýǵa arnaldy. Sondyqtan da baıandama jasap, ortaǵa shyǵyp sóılegen jandardyń bári qazaqtan ózge halyqtardyń ókilderi edi. Naqty aıtatyn bolsaq olar Esil aýdany Petrovka orta mektebiniń muǵalimi Mammatkarım Sarkýlov, Jambyl aýdany Býdenyı orta mektebiniń muǵalimiSvetlana Býnak, oblystyq qylmystyq-atqarý júıesi departamenti ES-164/6 mekemesiniń qyzmetkeri, ádilet aǵa serjanty Pavel Radıonov, Manash Qozybaev atyndaǵy Soltústik Qazaqstan memlekettik ýnıversıtetiniń stýdenti Karına Melıhova, Taıynsha aýdany Zelenogaı aýyldyq okrýgi Zelenogaı aýylynyń turǵyny Anna Vahovskaıa jáne t.b. boldy. Osynaý ózge etnos ókilderiniń qazaq tilin qurmettep, joǵary baǵalaǵanyna qaraǵanda qazaqtyń ózi «qoldaǵyaltynnyń qadirin bilmeı júr-aý» degen oıǵa qalady ekensiń. Bulardyń bári de qazaq tilin birshama jaqsy meńgergen, keıbiri ony ózderi de oqytyp, úıretip júrgen jandar eken, eń bastysy bizdiń tildi úırenýge degen yqylastary zor ekeni kórinip turdy. Oblystyq Tilderdi damytý basqarmasynyń bastyǵy Kemel Ospanovtyń aıtýyna qaraǵanda mundaı jandardyń sany jyl saıyn artyp keledi. «Biz osyndaı mádenı sharalardy jylda ótkizip turamyz. Alǵashqy kezderde qazaq tilin jaqsy biletin ózge etnos ókilderin tabý qıyn bolatyn. Qazir sharaǵa qatysýǵa ózderi tilek bildiredi. Osyǵan qarap bizdiń júregimizde qazaq tiliniń bolashaǵy áli alda shyǵar, onyń damýy arta túsetin bolar degen senim uıalaıdy», dedi ol. Sharaǵa belsene qatysyp, baıandama jasaǵandardyń biri, belarýs qyzy, ýnıversıtet stýdenti Karına Melıhovany áńgimege tartyp, onyń tildi úırený sebebin suraǵan edik ol: «Qazaq tilin úırenýdiń esh qıyndyǵy joq. Men ózim qazaqsha oqydym. Osynyń ózi maǵan ómirde talaı jerde jolymnyń jeńil bolýyna múmkindik týdyrdy. Sondyqtan men óz qurbylaryma ony tezirek úırenip alýǵa shaqyryp, úgittep júremin», dedi.
Mádenı sharaǵa «Nur Otan» HDP «Jas Otan» jastar qanaty, «Qyzyljar jastary» jastar qoǵamdyq birlestigi, Qazaqstan halqy Assambleıasy, BAQ ókilderi jáne M.Qozybaev atyndaǵy SQMÝ stýdentteri qatysty. Is-shara aıasynda tilderdi damytý salasyndaǵy yntymaqtastyqty damytý jónindegi memorandýmǵaTilderdi damytý basqarmasynyń basshysy Kemel Ospanov pen oblystyq Qazaqstan halqy Assambleıasy hatshylyǵynyń meńgerýshisi Muratbek Zeınýllın qol qoıdy.
QYZYLJAR