Sońǵy 3 aıda Qyzylorda qalasyndaǵy «Araı-2» jáne «Araı-3» shaǵyn aýdandary turǵyndarynan tıisti oryndarǵa aýyz sý sapasynyń nasharlaýyna baılanysty 19 shaǵym túsken. Bul týraly óńirlik kommýnıkasııalar qyzmetinde ótken brıfıngte «Qyzylorda sý júıesi» MKK basshysy Marat Jámıev baıandady.
Turǵyndar aryzyna baılanysty «Qyzylorda sý júıesi» men qalalyq turǵyn úı-kommýnaldyq sharýashylyq bólimi mamandarynan qurylǵan komıssııa sý qubyrlaryn júrgizgen merdiger mekemelerdiń qurylys talaptaryn saqtamaǵanyn anyqtady. Qurylys júrip jatqanda sý kózine jalǵanbaǵan qubyrdyń eki jaǵy bitelýi kerek. Bul talaptar saqtalmaǵandyqtan, onyń ishine qum, topyraq túsip, sol kúıinshe jalǵanyp ketken. Ol qubyrdaǵy qysym az kezde baıqalmaı, keıin biline bastaǵan. Qazirgi kúni sý sapasy qalypqa keltirildi.
Búginde qalaǵa kúnine 42,7 myń tekshemetr kóleminde sý berilip tur. Al jaz aılarynda bul kórsetkish eki esege jýyq kóbeıedi. Sý sapasyna qatysty belgilengen keste boıynsha bakterologııalyq saraptama ýaqytyly jasalyp tur.
Kásiporynǵa qarasty 800 shaqyrym sý qubyrynyń 20 paıyzyn jańartý qajet. 400 shaqyrymdyq káriz júıesiniń de osynsha bóligi eskirgen. Bul baǵytta josparlanǵan jumystar kestege sáıkes atqarylady.