Kezdesý barysynda Pıter Foster Qasym-Jomart Toqaevqa ulttyq áýe kompanııasynyń qazirgi jaǵdaıy men ony damytýdyń jospary, atap aıtqanda, jolaýshylar tasymalynyń ishki kólemin arttyrý jáne jańadan ashylǵan sheteldik baǵyttar, áýe bıletteriniń baǵasyn arzandatý sharalary jaıynda baıandady. Bul týraly Aqordanyń baspasóz qyzmeti habarlady.
Pıter Fosterdiń aıtýynsha, «Fly Arystan» enshiles áýe kompanııasyn ashqannan beri Qazaqstan álemdegi áýe tasymaly boıynsha ishki naryǵy jyldam damyp kele jatqan elderdiń qataryna qosylǵan.
Sonymen qatar ol Qazaqstan Prezıdentine kompanııanyń áýe parkiniń jańalanǵany, onyń ishinde, «Boeing-757» ushaqtarynyń uzaq jolǵa arnalǵan «Airbus A321» áýe kemesine almastyrylyp jatqany týraly aıtty. Budan bólek 2023 jylǵa deıin «Boeing-787» ushaqtaryn satyp alý jónindegi josparymen bólisti.
Memleket basshysy «Ashyq aspan» rejımin odan ári damytýdyń jáne jańa shet eldik baǵyttardy ashý, onyń ishinde, Sıngapýr, Nıý-Iork sekildi álemniń basqa da iri qalalarymen qatynas ornatýdyń mańyzdylyǵyn atap ótti.
Qasym-Jomart Toqaev el azamattary úshin áýe bıletterin arzandatý baǵytynda júrgizilip jatqan jumystarǵa basa mán berdi.