Qazaqstandaǵy ekologııalyq konıýnktýrany jaqsartýǵa BUU Damý baǵdarlamasy jáne Bitfury Group kompanııasy septesetin bolady. Osyǵan baılanysty Ekologııa, geologııa jáne tabıǵı resýrstar mınıstrliginde múddeli taraptar tıisti ýaǵdalastyqqa qol jetkizdi. Belgili bolǵandaı birlesken jumystar orman alqaptaryn ulǵaıtýǵa baǵyttalǵan.
Búginde elimizdiń jasyl qalqanyn ulǵaıtý maqsatynda birlesken joba ázirlenip jatyr. Osy arqyly parnık gazdarynyń kólemin azaıtý kózdelip otyr. Sarapshylardyń baǵalaýynsha, Qazaqstandaǵy orman kómirteginiń jalpy kólemi 718,3 mln tonnadan astam kómirtegi dıoksıdi ekvıvalentine teń. Jasyl beldeýdiń 4,6%-dan 5%-ǵa deıin artýy kómirteginiń ormandar arqyly sińirilýin jylyna qosymsha 2,9 mln tonnaǵa deıin ulǵaıtýǵa kómektesedi eken. Bul rette orman alqaptary sý resýrstaryn, bıoalýandylyqty, sondaı-aq ekotýrızm syndy baǵyttardy rettep, oń yqpal etetinin aıta ketken oryndy.
Qazaqstan 2016 jyly klımattyń ózgerýi jónindegi Parıj kelisimin ratıfıkasııalap, jeke sektordyń qatysýymen ınnovasııalyq sheshimderdi jumyldyrý arqyly 2030 jylǵa qaraı parnık gaz shyǵaryndysyn 15%-ǵa qysqartýǵa jospar qoıdy.
– Qazir Qazaqstandaǵy aýanyń negizgi lastaýshylary kólik jáne energetıka salalary. Jyl saıyn ekojúıege túsetin salmaq artyp barady. Iаǵnı, ormansyz, parnık gazynyń kólemi óse túsedi. Demek, Parıj kelisiminiń maqsattaryna jetý qıyndady. Mundaı jaǵdaıda memleketten bólek, jeke bastamalardyń da mańyzy zor. Sondyqtan biz Bitfury Group kompanııasynyń klımatty qorǵaý salasyndaǵy bastamasyn qoldaımyz, – dedi Ekologııa, geologııa jáne tabıǵı resýrstar mınıstri Maǵzum Myrzaǵalıev.
BUU Damý baǵdarlamasy jańa ekologııalyq kodekstiń jobasyna birneshe zańnamalyq usynys ázirledi. Onyń ishinde ormandardy baǵalaýdyń jańa ádisnamasy, sondaı-aq BUU-nyń klımattyq kelisimine saı Qazaqstandaǵy zııandy shyǵaryndy zattardy azaıtý jónindegi jobalar qamtylǵan.
– Qazaqstan Úkimetine qorshaǵan ortany qorǵaýǵa arnalǵan zańnamany jetildirýge jáne tabıǵatty tıimdi basqarý úshin qarjylyq máselelerdi sheshýge kómektesýdi jalǵastyramyz. Ásirese jekeleı bastamalardy yntalandyrýǵa mán berilmek, – dedi BUU Damý baǵdarlamasynyń Qazaqstandaǵy turaqty ókili Iаkýp Berısh.
Kezdesý sońynda taraptar yntymaqtastyq týraly úshjaqty kelisimge qol qoıdy. Seriktester Qazaqstanda orman alqaptaryn ulǵaıtý jáne orman paıdalaný tájirıbesin jetildirý, sondaı-aq klımattyń ózgerýi týraly jurtshylyqtyń habardar bolýyn kúsheıtý esebinen parnıktik gazdar shyǵaryndylaryn azaıtý boıynsha jumys isteıtin bolady.
Qazaqstandaǵy Bitfury Group Ǵalamdyq keńsesi ákimshiliginiń basshysy Vadım Krýtov jahandyq ekologııany qorǵaý úshin turaqty damý maqsattaryn tolyq qoldaıtynyn, kompanııa Qazaqstandaǵy parnık gazynyń kólemin azaıtý baǵytyndaǵy birlesken jumystarǵa tolyǵymen ázir ekenin jetkizdi.