Nur-Sultan qalasynyń ákimdigi Memlekettik akademııalyq fılarmonııasynyń «Halyq áni» bólimi «Altaı, Tarbaǵataı ánderi» atty konsert ótkizdi. Keshtiń negizgi maqsaty – «Rýhanı jańǵyrý» baǵdarlamasy aıasynda ulttyq-mádenı qundylyqtarymyzdy jańǵyrtý, qazaq dalasynyń qasıetti de kıeli mekeninen týyndaǵan án men kúı óneriniń ózindik órnekterin nasıhattaý.
«Dástúrli án qazaq mádenıetiniń san ǵasyrlyq qupııasyn óz qoınaýynda búgip jatqan qoıma tárizdi. Sonyń ishinde Altaı, Tarbaǵataı ánderi oıdaǵy jáne qyrdaǵy baýyrlardyń saǵynyshynan, tabıǵattyń ásem kelbetine degen súıispenshilikten týyndaǵan. Sonyń ishinde salt-dástúrimizdiń, ádet-ǵurpymyzdyń da kórinisi bar. Jalpy, qazaq mádenıetiniń ajyramas bir bólshegi», deıdi «Halyq áni» bóliminiń kórkemdik jetekshisi Seken Syzdyq.
Oryndaýshylyq máneri bir bólek, shyǵarmashylyq bitimi basqa Altaı, Tarbaǵataı ánderimen qosa, «Saryarqa» folklorlyq ansambli de avtorlyq shyǵarmalar men kúılerdi tartý etti. Kópshiliktiń qoshemetine bólengen ónerpazdar arasynda Qazaqstan Respýblıkasynyń Mádenıet qaıratkeri Qaragóz Gasımova jetigenmen konserttiń naqyshyn keltirse, Mádenıet salasynyń úzdigi Shyǵys Maqan sybyzǵyda óńirge tán áýendi ansambldiń súımeldeýimen usyndy. Sondaı-aq Nuraı Tanabaev, Kúnsulý Turlybekova, Danııar Muqan, Jazgúl Danylbaeva, Jaqsygeldi Maıasarov, Aınur Qonysbaeva, Nurjan Meıirhan, Alýa Qalymbekova, Aıdos Ońǵarbaı qatarly ánshiler kópshilikti erekshe áserge bóledi.