Ortalyq kommýnıkasııalar qyzmetinde Densaýlyq saqtaý mınıstrliginiń Taýarlar men kórsetiletin qyzmetterdiń sapasy men qaýipsizdigin baqylaý komıteti tóraǵasynyń orynbasary, Bas memlekettik sanıtarlyq dáriger Jandarbek Bekshın jáne mınıstrliktiń resmı ókili Dıas Ahmetshárip koronavırýs ınfeksııasyna baılanysty jańa málimettermen bólisti.
Bas sanıtarlyq dárigerdiń aıtýynsha, búginde QHR-daǵy jaǵdaı turaqtalǵan, kúndelikti ósý báseńdegen. О́tken kúnniń nátıjesi boıynsha aýrýdy juqtyrý 0,28% tómendegen. Alaıda, álemniń basqa elderinde koronavırýstyń taralýy qarqyn alyp jatyr.
Ońtústik Koreıa respýblıkasynda sońǵy eki kúnde koronavırýsty juqtyrý eki esege ósken. Bul jaǵdaı Ońtústik Koreıanyń eki provınsııasynda tirkelgen. Koreıada 23 myń Qazaqstan azamaty bar. Olardyń arasynda naýqas juqtyrǵandar tirkelmegen. Sonymen qatar Italııa elinde – 144, Japonııada – 132, Sıngapýrda – 89, Iranda – 43, Taılandta – 35, Malaızııada – 22, Vetnamda 16 naýqas tirkelgen.
«Bul memleketter qazirgi tańda bizdi erekshe alańdatyp otyr. Osy atalǵan memleketterge shyqpaýlaryńyzǵa keńes beremin. Eger aldyn ala josparlap qoısańyz bılet quny ózgerissiz qaıtarylady. Shetelde naýqas juqtyrǵandar arasynda Qazaqstan azamattary joq», dedi J.Bekshın.
Elge kelip jatqan árbir ushaqtyń jolaýshylary qatań baqylaýda. Sonymen qatar Jandarbek Bekshın barlyq shekaralas óńirlerge ózi baryp kórgenin alǵa tartty. Spıkerdiń aıtýynsha, búginde elge kiretin barlyq jol qatynas túrleri qatań baqylaýda. Koronavırýs elde tirkelgen joq.