Búgin Úkimet otyrysynda Ishki ister mınıstri Erlan Turǵymbaev kóktemgi sý tasqyny kezeńinde tótenshe jaǵdaılardyń týyndaý qaýpin azaıtý boıynsha is-sharalar jaıyn baıandady.
«Qazgıdromettiń qazirgi boljamy boıynsha eldegi qar qory men ózen basseınderindegi ylǵal qorynyń kólemi normadan aıtarlyqtaı joǵary bolyp otyr. Qar basý prosesi jalǵasýda. Nur-Sultan qalasynda, Aqmola, Shyǵys Qazaqstan, Qaraǵandy, Qostanaı, Pavlodar jáne Soltústik Qazaqstan oblystarynda jaǵdaıdyń qıyndaý yqtımaldyǵy joǵary. Qazir elimizde 609 eldi mekendi jáne 675 avtomobıl jolyn jáne 259 temir joldy sý basý qaýpi bar. Tasqynnyń aldyn alý maqsatynda jergilikti atqarýshy organdar eldi mekenderden 8,8 mln tekshe metrden asa qar shyǵardy», - dedi Erlan Turǵymbaev.
Mınıstrdiń málimetine sáıkes, tótenshe jáne shuǵyl shyǵyndarǵa rezervterde 34,2 mlrd teńge kózdelgen.
«Yqtımal sý basý jaǵdaıyna evakýasııalanatyn halyqty qabyldaıtyn 1 707 beket ázirlenip, marshrýttar jańartyldy, qajetti kólikter bólindi. Sondaı-aq turmys-tirshilikti qamtamasyz etý úshin ákimdikter qajetti quraldardy, azyq-túlik pen aýyz sý qoryn daıyndady. Sý tasqyny bolǵan jaǵdaıda jedel den qoıý maqsatynda ishki ister organdarynan jalpy sany 9 myń adam jáne 1 730 tehnıkadan arnaıy kúshter men quraldar toptamalary quryldy», - dedi Ishki ister mınıstri.