Qyzylordadaǵy Á.Tájibaev atyndaǵy oblystyq kitaphanada «Maslenısa» merekesine arnalǵan «Eski ǵasyr dástúrleri» atty folklorlyq shara ótti.
«Slavıane» qoǵamdyq-mádenı ortalyǵy men oblystyq kitaphana ujymy birlese uıymdastyrǵan keshke «Qoǵamdyq kelisim» KMM dırektorynyń orynbasary Asylbek Jumabaev, etnomádenı birlestikter ókilderi, J.Nurseıitov atyndaǵy №233 orta mektep oqýshylary jáne kitaphana oqyrmandary qatysty.
Merekelik sharada orys ultynyń óneri, taǵamdary, kıimderi, qolóneri men salt-dástúrleri týraly kitap kórmesi jasaqtaldy.
Kezdesýde oblystyq kitaphananyń dırektory Nurjamal Myrzamuratova men «Slavıane» qoǵamdyq-mádenı birlestiginiń tóraıymy Galına Sherbakova qatysýshylardy quttyqtap, birlik merekesine aınalǵan «Maslenısanyń» qazirgi qoǵamdaǵy orny týraly aıtty.
Mereke aıasynda slavıan etnosynyń salt-dástúrleri kórsetilip, «Sýdarýshkı» ansambli, «Nadejda» jastar toby solısteri án aıtyp, bı bıledi, «Shalqan» ertegisi jelisinde qoıyldy. Balalar halyq oıyndaryn oınap, jumbaqtar sheship, maqal-mátelder saıysyna qatysty.