Elordada kıberqaýipsizdik salasyndaǵy álemdik kóshbasshylardyń biri Trend Micro men qazaqstandyq T&T Security kompanııasy ǵylymı jáne tehnıkalyq áriptestikti bastaý týraly kelisimge qol qoıdy.
Jıyn barysynda kompanııa ókilderi men qatysýshylar qazirgi kezdegi memlekettik mekemeler, uıymdarǵa qatysty aqparattyq qaýipsizdik pen onyń túrleri týraly sóz qozǵady. Sonymen birge atalǵan saladaǵy qoldanylyp júrgen júıeniń kemshilikteri, halyqaralyq jáne qazaqstandyq kompanııalardyń «Kıberqalqan» júıesin nyǵaıtý jónindegi birlesken jumysy týraly áńgimeledi.
Negizi 2013 jyly qalanǵan T&T Security kıber qaýipterdiń jańa býynyna qarsy kúreske arnalǵan quraldardy daıyndaýǵa mamandanǵan kompanııa. Elimizde Sıfrlyq damý, ınnovasııalar jáne aeroǵarysh ónerkásibi mınıstrliginiń qoldaýymen jumys isteýde. Áriptestik aıasynda taraptar Qazaqstan aýmaǵynda aqparattyq qaýipsizdik salasyndaǵy birlesken jobalar men bastamalardy daıyndaýǵa jáne júzege asyrýǵa, sondaı-aq qolda bar sheshimderdi tereń tehnologııalyq biriktirýge baǵyttaýdy josparlap otyr.
Sıfrlyq damý, ınnovasııalar jáne aeroǵarysh ónerkásibi mınıstrliginiń Aqparattyq qaýipsizdik komıteti tóraǵasynyń orynbasary Rýslan Ábdiqalyqov «Mundaı áriptestiktiń ózi «Qazaqstannyń kıberqalqany» baǵdarlamasy jumysynyń nátıjesi dep esepteımin. Bul eldiń aqparattyq qaýipsizdiginiń nyǵaıýyna qyzmet etedi. Odan bólek elimizdi álemdik qoǵamdastyqqa jańa qyrynan, ıaǵnı kıberqaýipsizdik boıynsha sapaly sheshimderdiń óndirýshisi retinde tanytady. Sonymen qatar bul bastama qazaqstandyq IT-ónimderdiń eksportyna, kerisinshe álemdik brendterdiń qazaqstandyq naryqqa kirýine jol ashady», dedi maman.