Kenshiler astanasyndaǵy Senim 109 biryńǵaı úılestirý ortalyǵy buǵan deıin saǵat 08:00-den 20:00-ge deıin jumys istep kelgen bolsa, endi keńseniń operatorlary táýlik boıy turǵyndarǵa qyzmet kórsetetin boldy.
Senim biryńǵaı úılestirý ortalyǵynyń dırektory Rahat Sádýaqasov munyń 2020 jylǵa arnalǵan jospardyń bir tarmaǵy ekenin jáne onyń iske sátti asqanyn atap ótti.
– Endi bizdiń operatorlarymyz táýligine 24 saǵat boıy ótinishter qabyldaýǵa daıyn. Bizdiń maqsatymyz – azamattarǵa qoǵamdyq qyzmetter men aqparattardy usynýdyń sapasyn arttyrý, sondaı-aq qala turǵyndary men qonaqtarynan ótinishterdi qabyldaý men óńdeý úshin qolaıly alańqaılar qurý, - deıdi ol.
Senim 109 kommýnaldyq qyzmetter men memlekettik organdardyń qyzmetine qatysty azamattarǵa úsh aı boıy keńes beredi jáne ótinishter qabyldaıdy.
Aıta ketetin bir jaıt, Call-ortalyq iske qosylǵannan beri 8500-den astam ótinish kelip túsken. Onyń 6724-in operatorlar qolma-qol sheship, qalǵan 1919-yn tıisti mekemelerge jibergen.
Senim 109 qyzmetine qońyraý shalýdyń bes joly bar. Atap aıtqanda, 109 qysqa nómirine qońyraý shalý (qalalyq jáne uıaly telefondardan qońyraý shalý tegin), Senim109.kz, Telegram-bot, Senim109.kz portaly, Facebook senim109 (messendjerge habarlama nemese kez kelgen post astyndaǵy túsinikteme arqyly) jáne Belsendi Azamat mobıldi qosymshasy arqyly baılanysýǵa bolady.
Ázirge ortalyq tek qala turǵyndarynan ǵana ótinishter qabyldaǵanymen, jospar boıynsha aldaǵy ýaqytta Qaraǵandy oblysyn túgeldeı qamtıtyn bolady.
Senim 109 biryńǵaı baılanys ortalyǵynyń qalanyń barlyq kommýnaldyq kásiporyndaryn biriktiretinin jáne turǵyndarmen baılanys ornatýdyń biryńǵaı núktesi ekenin aıta ketken jón.
Qaraǵandy oblysy