Kúres túrlerinen Qytaıdyń Sınıan qalasynda ótýge tıis Olımpııa oıyndarynyń lısenzııalyq týrnıri Qyrǵystannyń bas shahary – Bishkekke aýystyryldy.
Birlesken kúres áleminiń (UWW) basshylary Aspanasty elinde koronavırýs dertiniń órshýine baılanysty osyndaı qadamǵa barýǵa májbúr bolǵandaryn málimdedi.
Kópshilik aldynda sóz alǵan aıtýly uıymnyń prezıdenti Nenad Lalovıch: «Azııa qurlyǵynda ornalasqan memleketterdiń ulttyq qurama komandalarynyń qatysýymen ótetin jarysty Bishkek qalasyna aýystyrýdy qup kórdik. Olımpıada joldamalary sarapqa salynatyn dúbirli doda 27-29 naýryz aralyǵynda ótedi. Sóz oraıy kelgende, osyndaı qysyltaıań jaǵdaıda bizge qoldaý kórsetip, irikteý básekesin ótkizge erekshe qulshynys tanytqan Qyrǵyzstan kúres federasııasyna sheksiz alǵysymyzdy bildiremiz», – dep til qatty.
Esterińizge sala keteıik, Olımpııa oıyndarynyń alǵashqy joldamalary byltyr Nur-Sultanda ótken álem chempıonatynda sarapqa salynǵan edi. Alaıda óz elimizde ótken jarysta bizdiń balýandardyń birazy kózdegen maqsatyna qol jetkize almady. Mine, endi sol olqylyqtyń ornyn irgemizdegi qyrǵyz elinde toltyrýǵa tıispiz.