Keshe Parlament Májilisiniń Tóraǵasy Oral Muhamedjanov Belgııa Koroldiginiń Qazaqstan Respýblıkasyndaǵy Tótenshe jáne ókiletti elshisi Danıel Bertrandy onyń ótinishi boıynsha qabyldady, dep habarlady osy palatanyń baspasóz qyzmeti.
Májilis Tóraǵasy óz sózinde Qazaqstan Belgııany senimdi áriptesi dep sanaıtynyn jetkizdi. “Qazaqstannyń EQYU-ǵa tóraǵalyq etýin qoldaǵan eldiń biri – Belgııa. Memleketimizdiń bedeldi Uıymǵa jetekshilik etýdegi kún tártibine usynǵan máselelerdi de Belgııa qoldaıdy dep senemiz. Bul mıssııa elimiz úshin ári mártebeli, ári úlken jaýapkershilik júkteıdi. Sondyqtan, bizdiń aldymyzda úlken mindetter tur. Prezıdent Nursultan Nazarbaev usynǵan Qazaqstannyń mańyzdy bir bastamasynyń biri – elimizde EQYU Sammıtin ótkizý”, dedi Oral Muhamedjanov.
Qos memlekettiń parlamentteri arasynda dostyq baılanys ornaǵan. 2006 jyly Belgııa О́kilder palatasynyń delegasııasy Qazaqstanǵa keldi. Sodan soń jarty jyldan keıin Májilis depýtattary jumys saparymen Brıýsselge bardy. Tájirıbe almasý baǵytynda kezdesýler ótti.
О́z kezeginde Danıel Bertran “Qazaqstan Belgııamen myqty dıplomatııalyq baılanys ornatqan el ekenin memleketimiz ben óz atymnan aıta alamyn. Aldaǵy ýaqytta jańa belesterge qol jetkizemiz dep oılaımyn. Eki el arasyndaǵy jáne parlamentaralyq qarym-qatynasty damytý úshin bar kúsh-jigerimdi aıamaımyn”, dedi.
Taraptar yntymaqtastyq kelisimderdiń nátıjesinde sońǵy jyldary eki el arasyndaǵy baılanysty jańa deńgeıge kóterý qajettigine toqtaldy. Qazir barlyq múmkindikter júzege asyp otyrmaǵany aıtyldy. Elimiz “Eýropaǵa jol” baǵdarlamasyn iske asyrý ústinde. Sonymen qatar, Qazaqstannyń ındýstrııalyq-ınnovasııalyq damý joly aıqyndalyp otyr. Eýropalyq odaqqa engen eldermen yntymaqtastyqty nyǵaıtý maqsaty kózdelýde. Sonyń ishinde Belgııamen aradaǵy baılanysty jandandyrý elimiz úshin mańyzdy. Sondyqtan saýda-ekonomıkalyq aınalymdy jaqsartý qajettigi sóz boldy.