2020 jyldyń 1 aqpanyndaǵy jaǵdaı boıynsha barlyq negizgi kórsetkishter byltyrǵy jyldyń sáıkes kezeńimen salystyrǵanda oń sıpatqa ıe. Zeınetaqy jınaqtarynyń jalpy somasy 10,9 trıllıon teńgeni qurap, bir jyl ishinde 16 paıyzǵa ósti. Bul týraly «BJZQ» AQ-nyń baspasóz qyzmeti habarlady.
Zeınetaqy jınaqtarynyń basym bóligi mindetti zeınetaqy jarnalary (MZJ) esebinen qalyptasqan. Al MZJ esebinen jınalǵan jınaq aqsha 10,6 trln teńgeni qurady. Bir jyl ishindegi ósim – 15 paıyz.
Mindetti kásiptik zeınetaqy jarnalary (MKZJ) boıynsha zeınetaqy jınaqtarynyń somasy 251,2 mlrd teńgege (ósim – 25%), erikti zeınetaqy jarnalary (EZJ) boıynsha 1,9 mlrd teńgege (ósim – 4%) jetti.
2020 jyldyń qańtarynda zeınetaqy jınaqtary shamamen 97 mlrd teńgege ulǵaıdy. Bul san mynadaı kiris jáne shyǵys aǵyndarynan qalyptasty:
- 86,7 mlrd teńge jarnalar túrinde kelip túsken, bul kórsetkish 2019 jyldyń sáıkes kezeńindegi kórsetkishten 22 paıyzǵa joǵary. Atalmysh somanyń 94 paıyzy MZJ esebinen tolyqty – bul 81,6 mlrd teńge. Odan ári MKZJ – 4,9 mlrd teńge, EZJ – 16 mln teńge.
- jyl basynan beri taza ınvestısııalyq tabys retinde 28,2 mlrd teńge túsip, salymshylardyń jeke zeınetaqy shottaryna (JZSh) esepteldi. Bul ótken jyldyń sáıkes kezeńindegi kórsetkishten (15,4 mlrd teńge) eki esedeı joǵary.
Sońǵy 12 aı ishinde zeınetaqy jınaqtarynyń tabystylyǵy – 6,68 paıyzdy, al ınflıasııa deńgeıi – 5,6 paıyzdy kórsetti. Osylaısha zeınetaqy aktıvteriniń naqty tabystylyǵy oń sıpatqa ıe. - 146 myńnan astam alýshy úshin zeınetaqy tólemderi men saqtandyrý uıymdaryna jasalǵan aýdarymdar 17,9 mlrd teńgeni qurady.